Charry Lane Coronel
/ Writer, Photographer
USA ba sa inyong bucketlist karong summer ang mag-glamping? Ang pulong ‘glamping’ gikan sa root words nga ‘glamorous – camping’.
Dili na gikinahanglang mobiyahe pa og layo kay ang usa sa labing barato nga glamping anaa ra sa atong silingang isla, ang Siquijor.
Ang glamping estilo sa pag-camping nga nasugdan sa mga Europeans ug Amerikano kaniadto ug hangtud nga nahimo na kining popular sa mga travel destination.
Lahi sa normal nga pag camping kay kumpleto sa kagamitan ang puy-an nga tent. Sama sa higda-anan, electric fan, side table, lamp shade ug power outlets.
Kon buot ma-experience ang luho nga camping, bisita karong summer sa Glamping Siquijor nga nahimutang sa Barangay Solangon, lungsod sa San Juan.
Kasagaran sa mga resort sa isla anaa nahimutang sa San Juan kay naila ang maong dapit nga adunay puti nga balas sa baybayobn.
Ang Glamping Siquijor usa sa labing dagsaon sa mga langyaw ingon man lokal nga turista gumikan sa lahi nga vibe niini.
Adunay dili momenos baynte ka mga tent nga anaa sa Glamping Siquijor.
Matag tent mahimong makasud ang unom ka mga tawo kansang presyo mag depende sa lokasyon.
Tagpila ang bayrunon
Mokabat sa P3,000 matag gabii alang sa duha ka tawo ang tent nga anaa sa first line sa beach area, samtang P2,500 ang anaa sa second line ug P2,000 ang anaa sa tumoy dapit sa entrance.
Adunay additional nga P500 nga bayranan sa matag extra nga tawo.
Gawas nga kumpleto sa kagamitan sulod sa tent, adunay balcony, sugbaanan, ug hayhayan sa mga sinina.
Mamahimong makaluto sanglit kumpleto kini sa gamit kusina ug mga condiments.
Shared ang bathroom apan limpyo nga aduna pay hot and cold shower.
Sa kadtong dili na buot pang magluto adunay gamay nga tindahan sa reception area diin makapalit og finger food ug drinks.
Mamahimo sab nga mag volleyball sa baybayon ug matag gabii adunay bonfire diin magtapok ang mga guest ug makighimamat sa usa’g usa.
Unsa man gyu’y naka espesyal aning Glamping Siquijor? Gawas nga instagrammable ang dapit, dinhi masaksihan ang labing nindot nga pagsawop sa adlaw habig sa Siquijor.
Booking address
Nasayran nga sa pagkakaron, dili una modawat og walk-in ang Glamping Siquijor. Mamahimong maka-book pinaagi sa ilang email address glampingphilippines@gmail.com o ba kaha sa Facebook page www.facebook.com/pg/Philippines.Glamping.
Unsaon pag-adto
Daghang paagi pagbiyahe paingon sa Siquijor, mamahimong mag bus gikan sa Cebu South Bus Terminal ug sakay padulong sa Liloan port o ba kaha bus pa-Dumaguete. Gikan sa Dumaguete, mosakay og fast craft o RoRo padulong sa maong lalawigan
Maayo Shipping sa Liloan Port, Santander habagatang Sugbo nga mobyahe Cebu-Larena, Siquijor 10:00 sa buntag matag adlaw.