Barrita: 100 ka tuig nga serbisyo publiko

MATOD pa ni Cebu City Mayor Tomas Osmeña, standard bearer sa Bando Osmeña Pundok Kauswagan (BOPK), ang mga Osmena nagserbisyo sa publiko sud na sa mokabat sa 100 ka tuig. Tingali sukad ni sa iyang apohan, ni kanhi Presidente Sergio Osmena Sr.

Atol sa paglusad sa kampanya sa BOPK alang sa eleksyon sa Mayo 13 didto sa Cebu City Sports Center niadtong Sabado, si Osmena niingon nga iyang ipadayon ang Osmena brand of service.

“Atong ipadayon. Simbako naay mahitabo nako, naa ta’y agi. Ang kinahanglan sa syudad, management, dili istorya,” matod pa ni Osmena. Mao lagi kon simbako dunay mahitabo niya, unsaon man pagpadayon sa Osmena brand of service?

•••

Ang mga netizens abtik kaayong mikomentaryo bahin sa giingon sa mayor nga Osmena brand of service. Ang uban kanila nangutana, “Nagpasabot ba kini nga magpadayon ang kahuot sa trapiko sa syudad?” “Magpadayon ba ang mga basura nga di makolekta?”

Di tingali ni mao ang Osmena brand of service. Kay sa panahon ni Don Sergio Osmena wa pa may trapik sa syudad, wa pay problema sa basura. Kini tungod kay naglabi pang tartanilya nga nagbiyahe sa syudad ug ang mga tawo mao pay mohipos sa ilang basura.

Pero makapahingawa ang gisulti sa mayor nga “simbako naay mahitabo nako.” Ang iyang kapikas ra ba, si Konsehal Margot Osmena, anaa na sa iyang ikatulo ug katapusang termino nga matapos karong Hunyo 30. Kinsa may mopadayon?

•••

Maputol ang 100 ka tuig nga serbisyo sa mga Osmena, gawas lang kon magpinarehas si Margot nila ni Konsehal Sisinio Andales ug Alvin Arcilla nga nidagan gihapon bisan kon napupos na ang ilang tulo ka sunod sunod nga termino.

Apan dunay timailhan nga magpadayon ang Osmena brand of service. Sumala sa mga taho, si Miguel Osmeña, ang bugtong anak sa mayor, nidiskurso sa labing unang higayon niadtong Sabado sa rally sa BOPK human gyud sa pagpamulong sa iyang amahan.

Pero ang mga botante sa syudad sa Sugbo ra gyud ang magbuot kon ipadayon ba o natagbaw na sila sa Osmena brand of service. Kon moingon ang mga botante nga period, aw, period na gyud.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph