GIPAHUGTAN sa Davao del Sur Police Provincial Office (DSPPO) ang seguridad sa probinsiya human nahitabo ang pagpamomba sa silingang probinsiya sa Sultan Kudarat, Miyerkules sa hapon, Abril 3.
Si Col. Alan Manibog, police provincial director, nagmando sa tanang istasyonan sa pulis nga pahugtan pa ang mga checkpoint ug istriktuhon ang pagsusi sa mga dalang bagahe sa mga pasahero.
Ang checkpoint sa kapulisan nakamuntar sa mga entradang bahin sa probinsiya isip pagpatuman sa election gun ban.
Hinuon, nasuta nga ekstorsyon ang motibo sa pagmomba sa Isulan apan gitataw sa kapulisan sa Davao del Sur nga dili gihapon mokompiyansa ilabi na nga hulga kanunay ang teroristang grupo ug nadugang pa ang mga New People’s Army (NPA) nga tigpangilkil sab.
Gibantayan sa kapulisan ang lihok sa mga NPA nga hayan mangayo og revolutionary tax sa mga politiko aron makasud sa ilang balwarte.
Si Manibog midason nga angayang magbinantayon sab ang publiko sa ilang palibot ug motaho dayon kon makita ang katingad-ang mga tawo o butang. (Orlando B. Dinoy)