TACURONG CITY -- Gilimod sa Bangsamoro Islamic Freedom Fighters (BIFF) ang pagpamomba sa Carlitos Chicken Restaurant didto sa Barangay Calawag 2, Isulan sa probinsiya sa Sultan Kudarat, Miyerkules, Marso 4.
Ang paglimod gihimo ni Abu Misry Mama, tigpamaba sa BIFF, ug gipangatarungan nga di sila makaako nga targeton ang mga sibilyan.
Matud ni Mama nga posibleng selos sa negusyo o pangilkil ang hinungdan sa maong pagpamomba.
Kahibaloan nga 18 ka tawo ang naangol human nibusikad ang improvised explosive device (IED) alas 3:15 sa hapon sa maong adlaw.
Mga samaron nga nadala ngadto sa Holy Nazarene Hospital mao sila Montasser Masundig, 21; Christian Casipe, 21; Datu Joven, 7; Laika, 10; Watselle, 16; Cyrell, 7; Ronel Carino, 27; Rosarie Joy Teodocio, 18; Nasser Masundig, 40; ug Norhani Mamasalagat, 26.
Nadala sab sa Doctors Specialist si Bai Aminah Japitana, 26.
Sa Sultan Kudarat Provincial Hospital, gidala sila Bai Ali Malidas, 32; Che-Che Malidas, 22; Ali Datu, 14; Jhonny Garcia, 41; ug Carl 8.
Gi-admit sab sa Galinato Hospital si Randy Trangullero, 40. Samtang sa Saint Louis Hospital, si Jenny Pagabangan, 32.
Kahinumdoman nga niadtong milabay nga tuig, duha sab ka pagpamomba ang nahitabo sa Isulan kon diin lima ka tawo ang namatay samtang daghan sab ang naangol. (Edgar E. Fuerzas)