MITAHAN sa kapulisan sa Sta. Ana Police Station ang traysikad drayber nga suspek sa pagpatay sa usa ka misis niadtong Lunes didto sa Belisario Village, Barangay San Antonio, Agdao District, Davao City.
Ang suspek si Emmie Balogbog, 37, ulitawo, nagpuyo sa maong dapit, kinsa boluntaryo nga mitahan sa kapulisan gumikan nakonsensya kini.
“Nakonsensya ko sa akong gibuhat,” ingon sa suspek kinsa miangkon nga naka-shabu siya niadtong mga taknaa uban sa iyang mga higala nga sila alyas Jeje, Alaw, Tawing, ug Payat.
Giangkon sa suspek nga wala na siya masayod sa iyang nahimo sa pagsulod niya sa balay sa biktima nga si Merlyn (bansagon gitago), 47-anyos.
“Nautangan pa nako to og kuwarta, pero sa ka-high na nako sa shabu, wala nako kabalo nga akoa siyang gisakal ang liog ug gipusposan og bangko,” saysay sa suspek.
Giingon niini nga unang higayon suma pa niya nga migamit og shabu diin grabe ang ka-high nga iyang nasinati.
Ang suspek nagbutyag nga wala niya lugosa ang biktima luyo sa pagkakaplag nga hubo na ang zipper sa pantalon sa babaye.
“Wala nako malugos, hapit lang, kay wala nako kabalo sa akong gihimo,” ingon sa suspek.
Kahinumdoman nga patay na ug nagkadugo nang napalgan ang biktima sud sa iyang panimalay, alas 6 sa buntag.
Unang nabalita nga bana sa biktima ang suspek, apan gipaklaro sa kapulisan nga dili bana kun di silingan niya kini.
Subay sa naunang spot report nga gipagula sa Sta. Ana PNP, nga bana sa biktima ang suspek.
Migula sa imbestigasyon sa homicide section sa Sta. Ana PNP, nasuta nga gipusposan og bangko nga kahoy tumong sa ulo ang biktima nga misangko sa iyang kamatayon.