GISAWAY ni mayoral bet Georgia Osmena ang iyang igsuong si Cebu City Mayor Tomas Osmena sa planong paghatag og allowance sa mga huwes nga sama sa kantidad sa ilang sweldo.
Matod ni Georgia nga di maayong mohatag ang mayor og allowance sa mga huwes kay posibling maapektohan unya ang ilang paghukom sa mga kaso nga maglambigit sa siyudad.
Alang kang Georgia mas maayong ang maong salapi gamiton sa pagpalambo sa basic services aron ang tanang katawhan maoy makapahimus niini.
“I don’t think we should be paying the judges because if the city has any cases with the judges how can they be fair? So I think the judges are well taken cared by the judiciary and I don’t think the city should be spending for them. I think the city should instead focus on what we need for the city,” nagkanayon si Georgia nga nahinabi sa Sun.Star Superbalita human nakigkita ang ilang partido sa ilang presidential bet nga si Gilbert Teodoro niadtong Dominggo.
Ang mayor nipahibawo sa maong plano sa tumong nga matabangan ang mga huwes sa ilang pinansiyal aron usab sila di matintal sa pagdawat og suborno.
Apan matod ni Georgia nga ang judiciary maoy angay mosulbad niini ug dili ang siyudad gumikan kay mas nagkinahanglan og pagtagad ang katawhan ilabina na sa paghatag og maayong serbisyo.
Gawas kang Georgia, ang kaatbang sa mayor sa pagka-kongresista sa south district, Jonathan Guardo, nisaway usab sa mayor sa gihimong sunodsunod nga pagpanghatag og mga allowance.
Nasayran nga gawas sa gipadak-ang allowance alang sa mga senior citizen nga gihimo nang P4,000, mohatag usab og tuition fee allowance ang mayor ngadto sa mga kabos apan intelihenteng mga tinun-an.
Mohatag usab siya og allowance sa mga senior citizen sa Cordova ug ang uwahi mao ang paghatag og allowance sa mga huwes.
Gitan-aw ni Guardo ang maong paagi sa mayor nga desperadong lakang gumikan kay mismong ang survey sa BOPK nagpakita nga di sila makakuha og solidong boto sa ilang partido.
Ang maong survey nagpakita nga lima ka mga Kusog candidate ang masud sa north district samtang usa ang makasud sa south.
“This despite the massive postering campaign of BOPK bets which Kusog has not done yet. I feel the city electorate wants check and balance in the city council as against the rubber stamp we have now,” nagkanayon si Guardo. (CPL)