NAGKAMINOS ang mga basura nga nakolekta gikan sa tulo ka dagkong mga sapa sa Sugbo nga gipanglimpyohan sukad sa Pebrero ning tuiga, apan nagkagamay usab ang mga partisipante sa clean-up.
Si Juan Yao, forester ug nirepresentar ni Jose Cleo Colis sa Provincial Environment and Natural Resources Office sa Department of Environment and Natural Resources (Penro)-DENR 7, nisulti niini atol sa iyang pakigpulong sa Water Summit sa Penro sa Kapitolyo niadtong Huwebes, Abril 4, sa Elizabeth Hotel, dakbayan sa Sugbo.
Matod niya, gikan sa 22.21 ka tonelada sa mga basura nga nahipos sa Bulacao River sa siyudad sa Sugbo atol sa clean-up drive niadtong Pebrero 22, niabot na lang og 12.12 ka tonelada ang nahipos pagka Marso 22.
Samtang gikan sa 5.61 ka tonelada sa mga basura nga nakuha sa Butuanon River sa dakbayan sa Mandaue niadtong Pebrero 22, nikunhod kini sa 1.72 ka tonelada niadtong Marso 22.
Apan sa Luyang River sa lungsod sa Carmen gikan sa 5.18 ka tonelada sa mga basura niadtong Pebrero 22, nidaghan kini sa 12.71 ka tonelada niadtong Marso 22.
Samtang, gikan sa 1,500 ka mga tawo nga nitabang sa pagpanglimpyo sa Bulacao River niadtong Pebrero 22, nahimo na lang kini og 1, 129 pagka Marso 22; 177 na lang usab ka mga partisipante ang nitabang og limpyo sa Butuanon River sa samang petsa gikan sa 481 niadtong Pebrero; ug 662 ka partisipante sa Luyang River gikan sa 1,105 niadtong Pebrero.
Sumala ni Yao ang pagpanglimpyo sa kasapaan kabahin sa tinguha sa kagamhanan nga mahiuli ang kahimsog ug kalimpyo niini sama niadtong unang panahon.
Si DENR Secretary Roy Cimatu unang nimando sa iyang mga regional director nga sila relibohan sa pwesto kon mapakyas pagpanglimpyo sa mga sapa sa ilang dapit.
Usa kini ka paningkamot ubos sa Rivers for Life (Recognizing Individuals/Institutions towards Vibrant and Enhanced Rivers) diin nagtinabangay ang gobiyerno ug pribadong sektor sa pagpanglimpyo sa sapa ug waterways.
Karong Abril 30 ang deadline sa pagduso sa entries alang sa Rivers for Life Award diin dinhi sa Central Visayas, 10 ka mga sapa ang gipilian: ang Butuanon River, Bulacao River, Sapangdaku River ug Luyang River sa Sugbo; Abatan River, Inabanga River ug Manaba River sa Bohol; ug Banica River, Panamang-an River ug Sicopong River sa Negros Oriental.
Karong Hunyo 10, 2019 ang awarding ceremonies. (SCG)