SUPLAY sa kuryente sa Lapu-lapu City Jail ang nabalik na sa miaging semana.
Kini human sa dul-an usa ka bulan nga nag-antus ang kapin P2,000 ka mga piniriso sa maong pasilidad.
Gitug-an ni Lapu-lapu City Mayor Paz Radaza nga gibayran na nila sa kagamhanan ang P1.5 milyones nga bayrunon sa City Jail ngadto sa Mactan Electric Company, diin lakip na niini ang bayad alang sa tulo ka bag-o nga mga transformer.
Sulod sa usa ka semana usab nga gilihok sa City Engineering Office ang kalabot sa pagpataud sa bag-ong mga electrical wiring nga gasto gihapon sa kagamhanan.
Kahinumduman nga sugod niadtong Marso 3, dungang nibuto ang tulo ka transformers sa City Jail tungod sa pagka overload.
Pahimangno ni Radaza sa BJMP nga nga limitihan ang paggamit sa mga piniriso sa kuryente, sama sa electric fans.
Gitataw ni Radaza nga nakasabot siya nga mas nagkadaku ang gikinahanglan sa kuryente sa nagkadako nga pasilidad. (FMD)