SAGUBANGAON ni Tom Jone “Wardog” Mangubat sa Omega Boxing Gym ang usa sa iyang tahas aron makab-ot ang iyang tinguha karong gabii sa dihang iyang ikaharong si Arnel “Silencer” Baconaje alang sa bakanting World Boxing Council (WBC) Asian Boxing Council silver featherweight title sa main event sa #Kumbati 2 on Friday night sa Parkmall, Mandaue City.
Ang wa pay pildi nga featherweight prospect Mangubat, kinsa may record nga 10-0-1, 9KOs) mipadayag nga ang iyang kusog og kaabtik maoy iyang dakong puhonan batok ni Baconaje nga may 10-3, 8KOs nga record.
“Slugger man ni siya. Ako lang tan-awon kon unsay iyang buhaton sa first round,” matod sa lumad nga taga Bukidnon atol sa weigh-in kagahapon nga gipahigayon sa Manggahan Restaurant sa Lahug, dakbayan sa Sugbo.
Si Jerome Calatrava sa Omega Sports International mipadayag nga ang maong away maoy magsilbing tikanganan ni Mangubat paingon ngadto sa mga dagko pang away.
Samtang gihulagway nga ang 25-anyos nga Baconaje maoy usa sa lisod nga makontra ni Mangubat sukad sa iyang pagka professional fighter. Si Baconaje usa ka kanhi Philippine champion ug nakaaway na kini og mga kanhi world title challenger sama nila ni Ernesto Saulong, kanhi world-ranked Japanese Yasutaka Ishimoto ug ang kanhi sakop sa ALA Boxing gym nga si Brian Lobetania.
Ning bag-ohay lang, si Mangubat nakatala sa iyang unang split draw ni Venson Delopere, samtang si Baconaje nagmadaugon sa iyang uwahing duha ka mga away diin iyang gipaundang sila si Danny Tampipi ug Dindo Cabintoy.
Sa tinimbangay kagahapon, si Mangubat mipatong sa weighing scale nga may 125.7 pounds samtang si Baconaje 125.1 pounds.
Sa the supporting main bout, si undefeated Ronnie Mark Vicelles (9-0-1, 5 KOs) makigsinukliay sa kumob batok ni kahin International Boxing Federation (IBF) Youth flyweight champion Robert “El Rapido” Onggocan (11-4, 7 KOs) alang sa bakanting VisProBA light flyweight belt; Ponciano Remandiman (9-4-1, 5 KOs) batok Rowel “Jaguar” Rosia (14-7-1, 7 Kos) sa eight-rounder alang sa VisProBA super flyweight title. (RSC, JBM)