MGA duwa karon:
7:00 pm. - Danao City vs. Sogod (venue: Danao)
7:00 pm. - Medellin vs. Tabuelan (venue: Medellin)
7:00 pm. - Alegria vs. Dumanjug (venue: Alegria)
Mipahagsa og 14-0 nga rally ang defending champion Talisay City Aquastars sa pagsugod sa fourth quarter nga maoy ilang gihimong ganghaan aron buntogon ang Minglanilla Archangels, 97-89, sa 3rd Cebu Governor’s Cup inter-cities/municipalities basketball 1st District final nga gipahigayon sa Talisay City Sports Complex niadtong Miyerkules sa gabii, Abril 3.
Perming naglabaw ang Archangels ni coach Edito Salacut sa unang tulo ka mga quarters, diin nakaposte gani kini og kapin sa napulo puntos, 34-24, apan hinayhinay kining gikitkit sa Aquastars.
Ang seasoned-pointguard nga si Jay Deiparine mikupkop og 29 puntos, lakip na niini ang tres ug ang iyang short jumper nga maoy nakapatabla sa unang higayon ug nakapasugod sa ginabsanay og sakmit sa bintaha.
Nigradwar si Deiparine sa katapusang 1:36 segundos sa fourth quarter, apan mihayag na ang ilang kadaugan.
Maayong nakatimang sa opensa sa Aquastars sila si Clark Ruedas nga may 16 puntos, Jhaylord Castro nga nakahipos og 13 ug 11 ang natampo ni Raffy Bacasmas.
Nangulo sa Minglanilla si Acer Go nga may 28 nga gidugangan og 22 puntos ni Ryzel Gilbuena.
"Actually, gikuyawan ta premiro kay lax kaayo ang mga bata. Kubol kaayo sila nga nakasugod. Mao to nga nabiyaan mi'g diyes puntos. Sigi tag push nga kinahanglan moagresibo sila. Maayo na lang ni-pick dayon sila sa fourth quarter," matod ni Talisay coach Rey Gurrea.
Sa 3rd District, gipakita sa Tuburan Coffee Makers ang ilang dominasyon batok sa Balamban Ship Builders, 92-71, aron usab sakmiton ang District title.
Gilubong sa Danao City ang Carmen, 96-81, ug gipukan usab a Sogod ang San Francisco, 81-70.
Ang tagsatagsa ka mga district champions nakadawat og tag P100,000 nga ganting salapi samtang P50,000 usab ang nabulsa sa mga runners-up.
Hinuon ang mga nakampiyon ug ang mga runners-up sa matag distrito madala gihapon sa quarterfinals rounddiin moabot ngadto sa 14 ka mga teams ang magitigi aron pagdeterminar sa semifinalists. (JBM)