NAG-INUSARA lamang nga mag-uuma nagikan sa probinsya sa Misamis Oriental ang milampos sa 11 ka bulan nga training didto sa nasod sa Japan.
Si Idelfonso Beltran, taga Barangay Rosario, lungsod sa Tagoloan, Misamis Oriental, usa ka mag-uuma sa ilang ektaryang umahan sa lungsod ang nag-inusarang representante sa rehiyon nga magpahigayon og training sa nasod sa Japan.
Kini parte sa Young Filipino Farmers’ Training Program in Japan (YFFTPJ) nga matag tuig nga gihimo sa nasod sa Pilipinas pinaagi sa Japan Agricultural Exchange Council aron sila mahatagan og oportunidad nga mapalambo ilang kahibalo sa pag-uma lakip na ang pagamit og mga teknolohiya sa matag sa agrikultura.
Ang Agricultural Training Institute (ATI) sa Department of Agriculture (DA)maoy nag-implementar sa programa.
Si Beltran kinsa dili trabahante sa Provincial Agriculture Office o ubang buhatan ang usa ka sa ka graduate sa Marine ang mas nipili nga magtikad pinaagi sa pag-uma aron mapuslan ang ilang ektarya nga kayutaan.
“Dili ko trabahante sa Pagro, farmer gyud ko sa amo sa Rosario sa Tagoloan, dili pod ko graduate sa Agriculture wala ko nakaskwela og kanang college sa Agriculture kay sa una nag sea fearer ko nag skwela ko. Pero kay mas ganahan man ko magfarm so mao to nga nagdecide ko nga mag farm,” saysay niini.
Matud niini nga mitanyag og training ang DA-ATI kon diin dinhi sa buhatan sa Provincial Agriculture siya nagsugod kay ang gipili kadtong mga aktwal nga mga mag-uuma. Sa pag-exam niya moabot sa 28 sila ka mga mag-uuma ug 3 ang mipasar sa dinhi sa rehiyon nga gipaubos na usab og eksaminasyon sa nasyunal kon diin duha nalang sila nahibilin usa nagikan sa Bukidnon.
“Pag abot na dayon sa final duha nalang mi. Bukidnon ug Misamis Oriental. Pag abot og Manila nag adto mi sa University of the Philippines gi training mi didto,” matud ni Beltran kon diin preparasyon kini sa ilang pagtraining sa nasod sa Japan.
Lakip sa gitudlo ang International husbandry ug Nihonggo class nga kinahanglan og 300 hours.
“Actually pag abot sa Japan abi namo enough na 300 hours kay ang Indonesia gani 6 months sila nagstudy sa Nihonggo ang Thailand kay 4 months ug ang Philippines ray 300. Pero pag abot sa Japan mas advantage sa Philippines kay flexible tag dila makahibalo man mi mag english mao ilang ganahan sa Philippines,” saysay niini.
Sa kinatibuk-an moabot sa 18 ka mga batan-ong mag-uuma ang nagtraining sa nasod karong tuig 2018-2019.
Training sa Japan
Paghidangat ni Beltran sa nasod sa Japan daw bag-o alang kaniya ug sa pagtoung kauban niya iyang mga classmate sa training daw gibulag bulag sila og taglagyo kaayo ug nagpuyo sa usa ka farm.
“Pag abot sa Japan didto mi gibutang sa area nga naa mi experience. Moadto mi sa ilang College of Agriculture nagskwela mi pati sa farm nagpuyo mi sa farm nga kanang isa kada farm tudloan mi sa ilang machine ug mga technology, ilang mga gamit like fertilizer, insect repellant, tapos naa pod silay technique nga kaya pod nako diri sa Pilipinas pero naa wala pod nato nakita before,” matud niini.
Daw mas daghan trainee gikan sa Pilipinas tungod kay daw ang hapon ganahan sa mga Pinoy.
“Ang Philippines maoy pinakadaghan nga trainee kay ang Hapon ang Philippines ilang i-request kay mokaon ug bisan unsa, ang lihok pod is abtik. Kadtong naa ko didto kantyawan ko kay akoy pinaka gamay ato nga farm, ikawalo ko nga trainee nga Pinoy, tas ako ang pinakagamay pero sila kay moalsa og 30 kilo nga bug-at pero ang trainee kay gaarsa pod mao na gaka amazed sila sa Pinoy kay like sa akong gibuhat,” saysay niini sa iyang naagian.
Human sa 11 ka tuig nga training migradwar sila sa Tokyo sa Olympic Center kon diin gipahigayon ang graduation niadtong Pebrero 22.
Niadtong Pebrero 23 nibalik sila dinhi sa nasod sa Pilipinas ug gipaubos og post evaluation sa cental office sa ATI.
Gamiton ang natun-an
Niaging semana gipasidunggan si Beltran ni Misamis Oriental Governor Bambi Emano tungod sa kalamposan niini sa Japan ug nag-inusarang Misamisnon milampos sa training niini sa maong nasud.
Aminado si Beltran nga adunay tanyag sa Japan nga didto na siya mopadayon og trabaho kay kulang sila og mag-uuma apan daw bout niyang i-share dinhi sa nasod sa Pilipinas ang iyang natun-an sa training kaysa didto kini sa laing nasod gamiton.
“Naa ko sa Japan mahimong trainee gikan sa Pilipinas para makatabang sa atong nasod. Akong target mag farm ug maghimo og learning insight ug ma share akong knowledge kadtong ilang offer okay unta kung wala koy farm ug dili ko interesado sa Pilipinas ako man god kay trainee ko sa Pilipinas dapat ang Pilipinas maoy magpahimulos nako,” sulti niini.
Sa iyang bahin ni Governor Bambi Emano iyang gibutyag nga posibleng kuhaon sa buhatan sa Pagro si Beltran aron maoy mopahigayon og mga trainings ug uban pa nga pwede mahimo niini aron makatabang sa mga mag-uuma ug ma-share niini sa Misamisnon iyang natun-an sa pag-uma.