GIKONSIDERA ni Mayor Oscar Moreno ang buot nga e-rekomenda sa Regulatory and Complaint Board (RCB) nga ipasara ang hotel diin na-rescue ang mga menor de edad niadtong nilabay nga adlaw sa Barangay Cugman, siyudad sa Cagayan de Oro.
Matud ni Moreno nga ipaagi og proseso ilabi na ang pagpasara sa hotel diin naluwas ang mga biktima apan kung dunay ebedensiya.
“Well naay due process, we will consider that but certainly that will be looked into with fairness and of course naay ebedensiya that would warrant the closure we will order the closure if kinahanglan gyud,” matud ni Moreno.
Gidugang pa niini nga kinahanglan usab nga ang City Social Welfare and Development (CSWD) motutok pag-ayo niini aron nga maprotektahan ang mga kabataan ug ang ubang sektor nga sagad dali nga mabiktima ug importante ang pagtinabangay.
“Kinahanglan ang social welfare has to keep its eyes and ears open all the time to ensure nga ang atong mga minors and other vulnerable sectors are protected, I think ang importante diha pagtinabangay,” dugang ni Moreno.
Angayan usab nga ang mga reception angayang tan-awon pag-ayo diha sa pagdawat sa ilang mga kliyente ug dili angayang tugotan nga mamahimo kining mga hotel, inn ug uban nga instrument diha sa mga ilegal nga kalihokan.
Samtang buot usab ni Teodoro Sabuga-a Jr., city administrator, nga gisugyot niini sa RCB nga makigpulong-pulong sa mga nanag-iya sa mga hotel, inn ug susama niini nga mga patigayon aron ipasabot ang tumong ug impostansiya sa pagproteher sa mga kabataan.
“What I really wanted nga ang tag-iya sa mga hotel dinhi they will implement it because they feel it is necessary to protect our children, kanang nakasabot sa tumong dili kay mahadlok ta kay naay balaod,” dugang niini.
Nasayran nga una na nga gibutyag ni Atty.Edgardo “Egay” Uy, tsirman sa RCB, nga buot gayud niini nga masilotan ang operator sa maong hotel ilabi na nga menor de edad ang naabuso sa pagpabaya matud sa tinugyanan sa maong patigayon.