ALANG sa Dabawenyang si Merlo Silva Albano, ang pag-officiate og Olympic qualifier di na bag-o kaniya tungod nahimo na niya kini sa Palestine sa nakalabay nga tuig.
Apan ang pagkuha kaniya aron paghimo sa samang tahas alang sa nagpadayong Tokyo 2020 Olympics women's football second qualifying round sa Tashkent, Uzbekistan mihatag og excitement kaniya.
"I'm excited at the same time happy to have a new learning experience," suma sa kanhi national team member sa Facebook interview tali SunStar Davao.
Siya gitudlo nga assistant referee sa qualifying event nga mahuman, Abril 10.
Si Albano nga parte sa Fifa, ang world governing body sa football, sukad 2012 nahimong parte sa Asian Football Confederation (AFC) elite sukad 2017.
Mao nga sukad niadtong 2012 nahatagan na siya og halos 20 ka Fifa ug AFC assignments sa abroad.
Suma niya, aron mapabilin ang maayong estado sa Fifa ug AFC gikinahanglan niyang mahimong aktibo sa Philippine Football Federation.
"Kailangan mapasa ang fitness test po every year para masulod ka sa Fifa. Ang qualification physically fit and recommended ka by AFC base sa imong performance every time naa kay appointments sa gawas," ni Albano.
Luyo sa kadaghang achievement niya sa abroad, padayon gihapon siyang naghatag og serbisyo sa Davao City-based tournaments, ug wa kalimti asa siya gikan.