MIREKLAMO ngadto sa kapulisan ang usa ka estudyante human gihatagan og peke nga kuwarta gikan sa money remittance niadtong milabay na adlaw sa dalang JP Laurel, dakbayan sa Davao.
Ang biktima giila lang sa alyas Jane, 18, temporaryong nanimuyo sa Brgy. Sasa, Davao City.
Subay sa iyang reklamo, gibutyag niini nga iyang gikuha ang gipadala sa iyang Papa nga P3,000 sa nahisgutang money remittance.
Pagkasunod nga adlaw, nibayad siya og tuition sa eskuwelahan gamit ang kuwarta nga iyang nakuha sa maong money remittance.
Apan dako ang iyang kahibulong sa dihang gisultihan siya sa kahera sa ilang tulunghaan nga peke ang iyang kuwarta.
Gilayon siyang nibalik sa money remittance center apan giingnan nga dili gikan kanila ang kuwarta.
Way nahimo ang biktima, gawas sa pagpa-blotter sa hitabo ngadto sa kapulisan.