NAHAN-ay na ang tanang kinahanglanon alang sa pagdagan ni Philippine marathon queen Mary Joy Tabal alang sa Olympic-qualifying race sa Ottawa Marathon, City of Ottawa, Canada karong Mayo 26.
Sa online chat sa Sun.Star Cebu, nagkanayon si Tabal nga ang iyang pagsalmot sa Ottawa Marathon nahimong posible gumikan sa panagtambayayong sa iyang major backer Motor Ace Philippines ug Milo Philippines.
Nagkanayon si Tabal nga ang iyang insentibo isip Milo Marathon Queen ihapak ngadto sa iyang biyahe sa Ottawa trip unya ang Motor Ace Philippines na ang moabaga sa uban pa niyang galastuhan.
“The winner of Milo Marathon is supposedly to be sent in one of the races in Asia but Milo has supported me with my goal to qualify to the Olympics,” pasabot ni Tabal, kinsa nipatigbabaw sa miaging unom ka sunodsunod nga mga edisyon sa Milo Marathon.
Si Tabal, kinsa maoy naggunit sa kasamtangang national record sa marathon nga 2:43:31, anaa na sa ikaupat niyang semana nga hugot nga pagbansaybansay sa Nippon Sports Science University sa Japan ubos sa paggiya ni trainer Aiko Usami.
Matod ni Tabal nga ang mga nag-organisar sa Ottawa Marathon malipayon human nasayod nga modagan siya pagbalik sa lumba.
Ning maong lumba naka-qualify si Tabal sa 2016 Rio Olympics.
“My goal for this year is to set another record (in Ottawa Marathon) and also to defend my gold medal in SEA Games,” asoy ni Tabal, kinsa lumad nga taga brgy. Guba, Cebu City ug kanhi SWU spriinter. (RSC, ESL)