LAMA sa politikanhong karera ni Mayor Paz Radaza kadtong pagkabangkarota sa Rural Bank of Subangdaku nga maoy nagdumala. Maoy gitumbok sa mga ficticticious loans o kaha kulang sa managerial skills. Natanggong ang 16 ka kaso sa Municipal Trial Court in Cities (MTC) ug 22 ka kaso sa Regional Trial Court (RTC). Pulos dukomentado ang mga ebidensya. Walay dag-anan si bisan kinsa kon papel na ang kontra. Mao nalay depensa ang paglangay sa kaso aron dili moirog ang ligid sa kamatuoran apan gastoso.
Namansahan usab si Paz kadtong pagkasuspenso og tulo ka bulan sa pagkalambigit sa 15M pesos salapi. Para sa Girls Scout-Cebu Chapter nga siyay treasurer. Gikan sa PDAF ni Rep. Clavel Asas-Martinez nga maoy president. Naunsa bang pagkaunsaa nga didto man mahapunta sa personal account sa kongresista nga dili baya pwede sa pribado nga account. Nunot niini nasang-at sa Sandiganbayan ang duha ka kasong falsification ug duha nga malversation.
Laing mansa ni Paz nga ang 37 anyos nga Mitsubishi road grader nga naglubog na giingong nalutsan og anomaliya. Gigahinan og 3.2M pesos sa pagpaayo bisan ang COA misugyot nga ibaligya nalang og 426,000 pesos nga maoy valuation sanglit karaan na kaayo. Nasuta nga wala diay ipaayo giingong gisundog ang pirma sa city engineer. Hangtod karon walay resulta sa gipasalig ni Paz nga iyang ipasusi kinsay nagpalusot.
Kanhi Rep. Arturo Radaza ingon og maapektohan sa kaso sa iyang kapikas nga si Paz. Gani dunay mga kaso usab nga nalambigitan hinuon wala pay nahukman. Inosente pa sa pasangil nga lamp post scam, medicine scam, computer scam, clean and green scam ug ghost payroll. Siya midagan og mayor kansang kaatbang ang kapitan sa Pajo nga si Ahong Chan sa Team Libre-PDP Laban.
Si Mayor Radaza midagan og kongresista sa nag-inusarang distrito sa Lapu-lapu. Mipasilong unta sa PDP-Laban human sa eleksyon sa 2016. Apan sa ilang pagbalitok gikan sa Liberal Party nasagmuyo kay wala dawata. Nanglood ang mga Radaza sanglit wala hatagi sa Certificate of Nomination and Acceptance (CONA) sa PDP-Laban sa ilang pagsang-at og sertipiko de kandidatura. Sa campaign rally god ni Duterte sa 2016 wala hatagig permit sa mga Radaza. Maoy gisabak si Atty. Eugene Espedido, kanhi magbabalaod ug numero unong konsehal sa Lapu-lapu. Napiling vice president sa William--Gothong-Aboitiz (WGA) nga maoy kinadak-ang shipping lines. Nakadawat og pasidungog gumikan sa makatagbaw nga pangalagad. Professor sa USC Law School nga nakaani og mga bar topnochers. Kanhi vice president sa Integrated Bar of the Philippines (IBP)-Cebu nga nakadawat og certificate of appreciation sa mga maayong natampo sa pundok sa mga manlalaban. (csa-1156@yahoo.com / 09064648954)