MODUSO og petition for exception ang Cebu City Government ngadto sa clerk sa Commission on Elections (Comelec) aron makapadayon sila og paghatag sa financial assistance.
Tuyo niini aron mahatagan nila og ayuda ang senior citizens, persons with disability, barangay tanod ug lupon sa 80 ka mga barangay.
Kini ang gibutyag ni City Legal Officer Joseph Bernaldez sanglit adunay posibilidad nga di makahatag ang Siyudad gumikan sa election ban.
“Magpadala ta og komunikasyon sa Comelec informing them that these are continuing projects. In other words, these projects are exempted from the coverage of the ban,” padayag ni Bernaldez
“It would be prudent nga I-hold lang una kay wa pa may approval. Sa akong pagtan-aw dili kaayo madugay ang approval,” dugang sa City Legal Officer.
Si Atty. Mark Jason Tirol, pangulo sa City Accounting Office, niingon nga wa pa silay gideklarar nga petsa sa distribution sanglit naghuwat pa sila sa tubag unya sa Comelec.
Ang City Government naghatagan og P1,000 matag buwan sa 75,000 ka mga lolo ug lola, tag P12,000 matag tuig sa 12,000 ka mga PWD, tag P4,000 sa 1,600 ka barangay tanod ug laing tag P4,000 sa 1,200 ka mga Lupon.
Si Bernaldez niingon nga ilang personal nga ihatod ang petition for exception ngadto sa Comelec central office sa mosunod nga mga adlaw.
Ilawom sa Section 8 sa Comelec Resolution No. 10511, ang wa maapil sa ban kinahanglan nga mangayo og exception ang requesting party. (PAC)