PAGTAKDO sa dugo nga nakuha sa National Bureau of Investigation sa sapatos sa prime suspect sa linuog nga pagpatay kang Christine Lee Silawan nagpasabot nga ang 18-anyos diha atol sa pagpatay sa dalaga.
Kini ang gipasabot sa medico legal officer sa NBI 7, Dr. Rene Cam, atol sa pagpakighinabi kaniya sa mga tigbalita niadtong Huwebes sa gabii.
Ang mga ginikanan ni Christine Lee gikuhaan og swab sample aron itandi kini sa kang Christine Lee ug sa mga ebidensya nga dunay pat-ak sa dugo nga nakuha gikan sa suspek.
Duha ka mga butang ang nakuha sa NBI 7 gikan sa suspek: kawo ug sapatos, way senina sukwahi sa unang taho.
Ang kawo ug sapatos giingon nga dunay pat-ak sa dugo hinungdan nga gikuha sa mga awtoridad.
“It means that the blood taken from the shoe of the suspect was that of an offspring or child of the parents (Silawan-Pardillo)... Meaning the profile that was taken from the stain (gikan sa sapatos) was the same as that of the parents (ni Christine Lee),” matod ni Cam.
Ang pat-ak sa gituohang dugo nga naa sa kawo nagnegatibo.
Si NBI-7 Director Tomas Enrile nagkanayon nga ang pagtakdo sa DNA sa nakuhang sample sa sapatos sa suspek nagpasabot nga nagunitan o nasaghiran siya ni Christine Lee.
Nipasabot pagdugang si Cam nga wa na siya masurpresa nga magduda ang abogado sa depensa sa resulta sa DNA test kay mahimong nagtuo kining gimaniobra sa NBI pinaagi sa pagbutang og dugo sa ebidensya.
Apan matod ni Cam nga kon ang dugo gikan pa sa suspek, di unta kini motakdo sa swab sample gikan sa mga ginikanan ni Christine Lee.
“No, Sir. If yung dugo comes rom the suspect, it will not have the same profile with the parents (Silawan-Pardilo) because then it will be a different profile. It will be a male profile, not a female profile. What was taken in the DNA that matched the profile of the parents was a female profile and the suspect is a male. So, it would be very impossible that his profile which is a male will match with the parents. It will not match,” dugang ni Cam.
Ang resulta sa DNA nga nag positibo igo na nga makabarog nga lig-on ang ilang kaso batok sa prime suspect.
Sa gipagawas nga resulta sa Public Attorney’s Office nga sukwahi sa resulta sa PNP Crime Laboratory, matod ni Cam nga si Dr. Benjamin Lara lang ang makapasabot niini.
Apan isip medico legal officer sa NBI 7, way dautan sa paghimo sa re autopsy kon aduna silay makita nga wa makita sa unang doktor nga naghimo niini.
Ila pang huwaton ang final nga resulta sa examination sa PNP Crime Lab kon na-rape ba o wa si Christine Lee base sa swab sample nga nakuha gikan sa kinatawo niini.
Mao kini ang ilang gamiton nga ebidensya sa pagpasaka na unya sa hingpit sa kaso sa korte.