GIKATAKDANG i-deliver sa service provider nga nakadaog sa public bidding sa 1,000 ka dash camera nga gipalit sa Cebu City Government karong buwana.
Si Francisco Ouano, operations head sa Cebu City Transportation Office (CCTO), niingon nga ilang hatagan og prayoridad sa paghatag ang kapin 600 ka mga public utility jeepney (PUJ) sa Dakbayan sa Sugbo nga adunay travel line gikan sa ilang buhatan.
Ang Cebu City Government nigahin og P5 milyones para sa maong proyekto nga gisukip sa annual budget sa miaging tuig human sa sunodsunod nga krimen sama sama sa pagpatay.
Si Ounano niingon nga para mabutangan og dash camera nga nagkantidad og P5,000 ang usa ka PUJ, kinahanglan ilang ipakita ang ang travel line, franchise, official receipt ug certificate of registration.
Sa higayon nga moabot na ang dash cam, ang CCTO mogamit sa portion sa South Road Properties aron adto ipahigayon ang installation sa gadget.
Ang service provider maoy mohatag, motaod sa mga dash camera ngadto sa mga PUJ.
Gipadayag ni Ouano nga kadtong mga PUJ nga nagbiyahian sa laing mga local government unit apan adunay travel line gikan sa CCTO, makakuha gihapon sa maong gadget.
Lakip sa mga rota nga anaa sa dakbayan sa Sugbo mao ang nagagikan sa Pit-os, Talamban, Carbon, Plaza Housing, Lahug, Apas, Guadalupe, Colon, Osmeña boulevard, Labangon, Pardo, Mabolo, North Reclamation Area,Mambaling, N. Bacalso ug uban pa.
Si Mayor Tomas Osmeña, kinsa maoy unang niduso sa pagpalit og dash cam, niingon nga mahinungdanon kini sa pagpatuman sa kahapsay ug kalinaw labi na sa pagsulbad sa krimen.
Ang mayor nidasig sab sa mga private car owner sa pagtaod og dashcam sanglit sagad sa mga krimen anha mahitabo sa karsada.
Si Atty Marchel Sarno, OIC election officer sa south district, nagkanayon nga wa maapil sa Comelec Resolution No. 10511 kun election ban, apan kinihanglan gihapon nga mo-file og petition for exception ang City Government sa clerk sa Comelec Manila sa di pa sila tugotan nga makapanghatag subay sa section 8.