GIBUTYAG ni Police Superintendent Surki Sereñas, kinsa tigpamaba sa Police Regional Office (PRO)- Northern Mindanao, nga nakaalerto ang tibuok pwersa sa kapolisan sa rehiyon.
Kini human sa pagpamomba nga natigayon sa Sultan Kudarat.
Direktiba ni Police Chief Superintendent Timoteo Pacleb ang Regional Director sa PRO-Northern Mindanao nga dili paubsan ang alert level apan mas palapdan.
Gimando niini nga pahugtan ang pagpahigayon og checkpoint sa entrada ug mga exit point sa rehiyon.
“Actually dako atong concern sa nahitabo nga bombing wala ta nag downgrade sa alert level. Posible lang i-maximaize atong checkpoint. Naa nata’y directive sa checkpoint sa entrance ug exit sa rehiyon,” butyag ni Sereñas.
Kahinumduman nga moabot sa 18 ka mga tawo ang samaran sa pagbusikad sa improvised explosive device sa Isulan, Sultan Kudarat, niadtong mga alas 3 Miyerkules sa hapon, Abril 3.
Nahitabo kini sulod sa Carlitos Chicken sa National Highway sa Barangay Kalawag 2.
Lakip sa samdan ang buntis ug mga minor de edad.
Wala pay matumbok nga suspek sa pagpamomba.