SECTIONS
Saturday, August 24, 2019
SUPERBALITA CEBU

‘Kuratong’ misukol, patay

CEBU. Nasikop sa mga sakop sa Mandaue City Police Office si Niel Parojinog (naglingkod) ug si Elizalde Colanag (naghigda) sa duha ka managlahi nga operasyon sa maong siyudad. Ang duha kay gidudahan mga sakop sa Kuratong Baleleng ug Ozamis Robbery Group. (SunStar foto/ Allan Cuizon)

TULO ka mga tawo ang napatay ug duha ang nasikop atol sa pagpatuman sa kapulisan sa duha ka managlahi nga mga search warrant sa pagtiner og di lisensyado nga armas sa duha ka managlahing mga lugar sa Dakbayan sa Mandaue.

Sila giingon nga mga sakop sa Kuratong Baleleng ug Ozamis roberry-drug syndicate.

Alas 11:40 Biyernes sa gabii, Abril 5, gipatuman sa mga sakop sa City Intelligence Branch sa Mandaue City Police Office ang search warrant batok kang Eduardo Omac Baliling, taga Valencia, Bukidnon.

Ang search warrant sa kalapasan sa Republict Act (RA 10591) giisyu ni Judge Mercedita Dadole- Ygnacio sa Mandaue City Regional Trial Court, gipatuman batok kang Baliling sa sitio Paradise, Brgy. Looc.

Matod sa kapulisan nga sa pagpatuman sa search warrant uban sa subject ang giingon nga laing armado nga giila nga si Henry Labajo, lumad nga taga San Pablo, Zamboanga City ug Elizalde Colanag, 59 , lumad nga taga Purok 5, Katugasan, barangay Dampas, syudad sa Tagbilaran, diha.

Giingon nga sa dihang gi-serve na nila ang search warrant sa balay nga giabangan ni Baliling, giunhan sila sa pagpamusil.

Way naigo sa mga pulis, kinsa nibawos isip pagproteher sa kaugalingon hinungdan sa pinusilay.

Sila si Baliling ug Labajo naigo sa nagkadaiyang bahin sa lawas.

Gidali unta sa pagdala ang duha sa tambalanan, apan namatay.

Na-recover sa kapulisan ang duha ka .45 kalibre nga pistola gikan sa duha.

Samtang si Colanag nasikop, nakuhaan og .38 kalibre nga armas ug tulo ka mga bala niini.

NASIKOP, PATAY

Sa susama nga oras, ang laing mga sakop sa CIB-MCPO nipatuman usab sa laing search warrant batok kang Frederex Secretario, alyas ‘Sweet-sweet’, taga Tikup High, Back Magnolia Plant, Brgy. Tingub, Mandaue City.

Atol sa pagpatuman sa search warrant, nasikop sa mga operatiba si Niel Parojinog, 24, apan napatay ang iyang uyoan nga si Jessie Parojinog, alyas Oyong.

Matod sa CIB nga sa pagpatuman sa warrant sa giabangan nga balay ni Secretario, giingon nga kalit namusil si Oyong hinungdan nga nibawos ang mga pulis.

Sa dihang na neutralize na si Oyong, gidali nila pagdala sa tambalanan, apan gideklarar nga dead on arrival.

Apan ang subject sa search warrant nga si Secretario nakaeskapo.

Gitug-an ni Police Lt. Col. Bernouli Abalos, pangulo sa CIB-MCPO, usa ka buwan nilang gipanid-an sila si Jessie ug Frederix.

Giangkon ni Abalos nga mga sakop ang duha ka subject, ang duha nga nasikop ug ang tulo nga napatay sa Kuratong Baleleng ug Ozamis robbery-drug group.

Gani aduna pa untay laing search warrant sa uban pa nga kauban niini, diha ra gihapon sa syudad sa Mandaue ang dungan usab unta nila nga gipatuman, apan wa na sa ilang gipangpuy-an.

TABANG SA OZAMIS

Nakuha nila ang mga kasayuran sa maong mga tawo sa tabang sa intelligence group sa Ozamis Police.

Giangkon ni Abalos nga nakadawat sila og taho nga pipila kini sa mga sakop sa Ozamis syndicate nga anaa sa Mandaue nagtago.

Giingon nga sukad pa diay sa miagi nga katuigan magsulod-gawas ang pipila ka mga sakop sa maong grupo.

Sila giingon nga maoy responsable sa mga tulis ug tinubdan sa mga gun-for-hire.

Gisusi usab sa MCPO kon nganong kasagarang anaa sa syudad sa Mandaue nagtago ang grupo.

“We are closely coordinating with Ozamis police. Sila yung nagbibigay sa atin ng ibang information regarding some of the whereabouts ng mga subject natin. And mga member talaga sila (subject) ng Parojinog robbery-drug syndicate,” asoy ni Abalos sa Superbalita Cebu.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph