MAGUINDANAO Province--Patay ang upat ka mga sakop sa Bangsamoro Islamic Freedom Fighters (BIFF), apil ang igsuon sa usa ka kumander sa binakbakay tali sa mga sundalo alas 4 Biyernes sa hapon, Abril 5.
Samtang nailog sab sa militar ang kampo sa BIFF nga giingong tagoanan sa ilang armas ug eksplosibo.
Gikanayon ni 6th Infantry (Kampilan) Division Chief, Major General Cirilito Sobejana nga na-engkuwentro sa miligar ang 60 ka sakop sa BIFF, ilawom ni Shiek Esmail Abdulmalik alyas Kumander Abu Toraife sa Barangay Pamalian, Datu Unsay sa nahisgutang probinsiya kon diin nilungtad kini og usa ka oras.
Tungod gibombahan sila sa militar gamit ang 105 mm Howitzers Cannon, niatras ang BIFF pasulod sa hilit nga dapit sa SPMS Box ug gi-abandona ang ilang kampo.
Ang igsuon nga napatay sa binakbakay mao si Ali Abdulmalik, igsuon ni Kumander Abu Toraife.
Nakuha sab mga sundalo ang daghang mga armas ug improvised explosive device (IED) apil na mga bala gikan sa kampo.
Nilusad og paglutos ang Joint Task Force Central batok sa niikyas nga mga BIFF.