MAGUINDANAO Province-- Nagpinggit sa sobrang kasakit ang 13- anyos nga bayong-bayong nga nabuthan sa armas alas 3:10 Biyernes sa hapon, Abril 5.
Ang samaran nga biktima giila nga Norodin Kasim, molupyo sa Barangay Bliss, Datu Odin Sinsuat sa nahisgutang probinsiya.
Matud ni Police Colonel Ronald Briones, nangulo sa Maguindanao Police Provincial Office nga gidula-dulaan sa biktima ang armas sa iyang amahan nga kalibre .45 nga pistola.
Samtang nagkasa-kasa ang batan-on sa armas, aksidenteng nibuto ug naigo ang iyang tiyan.
Gitabang si Kasim sa iyang pamilya ug gidala ngadto sa Cotabato Regional and Medical Center sa siyudad sa Cotabato ug anaa sa talandugong kahimtang.
Nasayran nga ang armas gitagoan sa amahan sa hunos sa aparador apan nakalimtan niini nga ikandado hinungdan nga gikuha kini sa anak ug gidula-dulaan nga maoy hinungdan sa aksidente.
Nasayran sab nga ang amahan sa biktima sakop sa Moro Front sa Maguindanao Province apan giimbestigahan kini kapulisan sa Datu Odin Sinsuat Municipal Police Station.