WALA nagmalampuson ang pito ka mga construction workers human nabulabog ang ilang pagpalusot og mga tabako sud sa Davao City Jail, sa Ma-a alas 9 sa buntag niadtong Biyernes, Abril 5.
Sumala ni Bureau of Jail Management and Penology (BJMP) Davao Region Officer-in-Charge Jail Chief Superintendent Allan S. Iral nga gisulayan og pasulod sa pito ka mga trabahante sa nagpadayong konstruksyon sud sa prisohan ang unom ka pakite sa tabako ug ang 63 ka mga tabacco bars.
Giingon sa opisyal nga gisulod kini sa pito ka trabahante sa ilang duha ka inverter welding machine ug carton sa electric grinder, aron di mailhan.
Apan sa gipahugtan nga seguridad, nasakpan sa mga jail guards ang mga kontrabando luyo sa ilang hugot nga pagrikisa sa mga dala sa mga tawo pasulod sa maong prisohan.