WALA’Y plano si Team Pilipinas coach Yeng Guiao nga ilakip ang batan-ong higante nga si Kai Sotto sa iyang training pool alang sa 2019 Fiba Basketball World Cup sa China.
Nagkanayon si Guiao nga gusto niyang makatutok si Sotto sa training niini sa Amerika alang sa pagduwa niini sa Europe ug sa kampanya sa Batang Gilas sa 2019 Fiba Under-19 Basketball World Cup sa Greece karong Hunyo.
“We already did consider him sa isang window so siguro for now, we just want him to focus on the Under-19 and then focus on his plans to train abroad,” matod ni Guiao sa interbyu sa Spin.ph.
“Hindi na namin siya siguro ilalagay sa pool for this time so that he can focus on those two things, competing in Greece and continuing his development abroad.”
Si Sotto nakaapil na sa training pool sa Team Pilipinas sa 5th window sa FIBA World Cup Asian qualifiers apan wala kini nahilakip sa lineup nga nakigbatok sa Kazakhstan ug Iran sa miaging tuig.
Ang 7’2” nga 16 anyos nangandoy nga mahimong labing unang Pinoy nga makaduwa sa National Basketball Association (NBA).
Ang iyang training sa Amerika ug ang pagduwa puhon sa Europe maoy usa sa nakitang pamaagi ni Sotto aron mabaid pa og samot ang iyang abilidad alang sa katumanan sa iyang pangandoy.
Nagsugod na si Sotto pagbansaybansay sa Atlanta Hawks training facility nga mao ang Emory Sports Medicine Complex.
Gipasalig nang daan ni Sotto nga bisan asa siya moabot sa iyang paggukod sa iyang pangandoy, andam siyang moduwa sa Team Pilipinas sa ugma damlag. (ESL)