GI-CONGRATULATE ug gigakos og maayo ni Charles Amamag, 61, ang iyang apo nga si Carla Mae Francis sa dihang sila subli nga nagkita, tungod kay nitapos ang apo isip cum laude.
Ang apohan nga babaye niini nga si Fidela Amamag, 63, nasurprisa sa maayong balita nga gipahibawo sa apo.
Si Carla, 20, ni-graduate sa kursong Bachelor of Elementary Education sa University of Cebu main campus, dakbayan sa Sugbo niadtong Marso 20 sa New Cebu Coliseum.
Wa siya magdahom nga mahimong cum laude.
Matod niya, nagsilbi nga inspirasyon sa iyang pagtungha ang iyang pamilya labi na ang iyang mga apohan nga sila si Charles ug Fidela nga gitahod niya nga Paping ug Maming.
“Nagpasalamat ko nila sa tanang sakripisyo nila. Daghan ko og pagkuwang nila pero ila gihapon kong gidawat,” pahayag ni Carla.
Si Charles tua manarbaho sa Davao ug wa kini makatambong sa adlaw sa graduation ni Carla.
Si Carla, nadasig mahimong usa ka maestra tungod kay kini usab ang kurso sa iyang iyaan nga si Charlindhil Amamag-Bohol sa dihang nagtungha sa kolehiyo.
“Nag-start ko kay Ate Cha kay inig uli niya sa balay daghan siya mga buhaton, assignments, school works. Na-inspire ko niya,” paambit ni Carla.
Gawas nga cum laude, nakadawat usab og certificate ug medal si Carla isip role model sa ubang mga estudyante sa ilang unibersidad ug laing certificate alang sa Para Teacher and Tahal Extension Program.
Kini nga mga pasidungog gitunol atol sa hooding ceremony sa ilang tunghaan.
Si Carla nidasig sa ubang mga batan-on nga mosalig sa Ginuo, magkugi sa pagtuon, ug positibo lang ang hunahunaon.
“Always see the good side in every bad situation,” dugang niini.
Si Carla aktibo usab sa mga kalihokan gawas sa tunghaan, usa niini ang iyang pagka miyembro sa Charismatic Choir sa Sto. Tomas de Villanueva Parish sa Barangay Poblacion Pardo, siyudad sa Sugbo. (SCG)