DIHANG namatay si Joselito, ang siyete anyos nga apo nilang Ingko Benito ug Inse Gundina, nagbangutan sa hilabihan ang mga tigulang. Ingon sa dili nila madawat, ilabi na ni Ingko Benito, ang gidangatan sa bata. Himsog ug masaya nga pagka bata si Joselito. Malantip ang salabutan nga nagtungha sa unang anag-ang sa elementarya. Unya kalit nga gikuha ni Bathala. Namatay kini sa wa matugkad nga balatian.
“Gunding, tinuod kaha nga maluluy-on ang Diyos?” matod ni Ingko Benito.
“Ha?” nakalitan si Inse Gundina sa pangutana. “Tinuod, uy! Ngano? Nagduhaduha ka diay, Benito?”
Miginhawag halawom si Ingko Benito. Wa na motingog. Relihiyusa ang iyang asawa. Naglikay siya nga magkalalis lang hinuon sila. Apan sa iyang kahiladman milandong ang pagduhaduha, nga tingali wala maluoy kanila ang Diyos, kay nagsunod gayud ang trahedya nga midangat kanila. Una, namatay si Alona, anak nilang Ingko Benito ug Inse Gundina ug inahan ni Joselito. Nalunhat sa pagpanganak. Unya karon, si Joselito, ang pinalangga nilang apo, gihikaw pa kanila sa Diyos nga Maglalalang? Daw gusto nang mahayan ni Ingko Benito ang Kahitas-an.
USA ka gabii nagdamgo si Ingko Benito. Naglutaw siya sa hangin. Mipanaw sa kapunawpunawan sa tumang katulin. Wa madugay iyang nalantawan ang dakong siyudad nga nagbanaag sa kahayag. Ang mga edipisyo daw hinimo sa bulawan. Pagka taudtaod mao na lamay iyang naamguhan nga siya nahitugpa sa usa ka matahom kaayong tanaman. Binakbakan kini sa mga mahalong mga bato sama sa sapiro, esmeralda ug rubi.
Unya nahasiga ang iyang mga mata. Libuan ka manulunda uban sa dakong panon sa kabataan ang nagpaingon sa tanaman. Nanag-awit ang mga manulunda, samtang nanagsayaw ang kabataan sa tumang kamaya. Puno sa kalipay ang inosente nilang mga panagway. Wala sila ing kabalaka, ni unsa man nga kahingawa. Daw ang tanan gisalig nila sa mga manulunda nga sa tanang panahon nanagbantay ug nanag-atiman kanila. Labi pang nahasiga ang mga mata ni Ingko Benito dihang iyang nalantawan didto sa panon sa kabataan nga nanaghudyaka si Joselito. Nakasinggit siya sa kahinangop. “Joselitooooo...!”
“Benito! Benito, pagmata...!” Kalit nahabangon si Ingko Benito sa kusog nga yugyog ni Inse Gundina sa iyang abaga.
“Ha? Unsa?” ni Ingko Benito nga naalimungawan.
“Gidaman ka. Gitawag mo si Joselito. Unsa diay imong damgo?” ni Inse Gundina nga nahingawa.
Gisugilon ni Ingko Benito ang iyang damgo. Puno sa kamaya ang iyang dagway samtang nagsaysay gikan sa sinugdanan hangtod sa katapusan.
“Gunding, dili diay ako angay nga magmahay sa Kahitas-an tungod sa kamatayon ni Joselito. Malipayon kaayo si Joselito nga Iyang gipabantayan sa mga anghel sa Langit. Tua ang atong apo sa gingharian sa atong Ginuo!” ni Ingko Benito. Unya gigakos niya ang iyang asawa nga natakdan sa iyang kalipay niadtong gabhiona. (KATAPUSAN)