KADA katapusang Sabado sa Marso, mao ang Earth Hour dinhi sa Pilipinas. Sud na sa hapit 10 ka tuig, ang Habagat nagpasiugda og night ride. Niadtong Sabado, human wa ko moapil sa miaging tuig, nakahukom ko nga mosalmot na sab. Di taas ang rota but igo nang makalingaw, labina niadtong mga pamilya nga ganahan lang og joy ride.
Tuod man, samtang didto ko sa Plaza Independencia, niduol si city environment head Nida Cabrera nako. Nagkaestorya mi og makadiyot kalabot sa iyang proyekto sa paglimpyo ug pagpanindot sa kasapaan.
Sama sa akong mga kasinatian sa mga kalihukan nga akong giapilan nunot sa akong adbokasiya kaniadto, matod ni Mam Nida samtang sila nanglimpyo, dunay pipila ka mga residente nga nakaako sa paglabay sa ilang mga hugaw sa sapa sa Pardo. I am sure, kon ila ning gibadlong, posible pang maoy nasuko base usab sa akong nangaging kasinatian.
Apan bisan pa man, iyang gisaad nga iyang ipadayon ang iyang mga plano sa paglimpyo ug pagpanindot sa kasapaan, labina sa mga kilid niini.
KOMUNIDAD
Ako siyang gisultihan nga unta, ang mga barangay nga gilagbasan aning kasapaan maoy mag-una sa pagbantay, paglimpyo ug seguraduhon nga way mga hugaw nga malabay niini. Ambot kon nakaamgo ba kaha ang mga barangay kon unsa ka mahinungdanon ang atong mga river system.
Ang kasapaan mamahimong tinubdan sa tubig, nga kon di man gani mainom, magamit sa laing mga katuyoan, sama sa construction, pagbubo sa mga tanaman ug kaumahan. Apan makapahimangod nga wa kini huna-hunaa sa mga tawo nga nagpuyo sa kilid niini.
Kanang mosikad mi sa kabukiran ug moagi sa mga sapa, maguol kong magtan-aw sa mga alad sa baboy nga naa ra sa kilid ug ang hugaw mopadulong sa tubig. Kadto sang mga balay nga way pansayan, ang mga nagpuyo naa ra sab sa kilid kilid naglabay sa ilang hugaw. Makita baya ang mga hugaw sa tawo.
BARANGAY
Kaanindot unta kon aktibo sa pagpanalipod sa kalikupan ang mga barangay official. Apan makaguol kay pipila lang kanila ang aktibo niini. Sa ako nang giingon, ang kaakuhan o responsibilidad sa pag-atiman sa mga tugkaran iyaha sa barangay, gikan sa illegal drugs ngadto sa kalikupan.
Nakadayeg ko sa mga barangay sa isla sa Camotes kay kadaghan na ko makaagi diin ang mga lumolupyo nanglimpyo sa kadalanan. Kana nga talan-awon wa ko makakita niini dinhi sa Cebu City. Hinuon, nagtipun-og nga mga basura ang mosugat sa imong mga mata. Makauuwaw kaayo.