USA ko sa nagpaabot sa bag-ong pelikula ni Arci Muńoz ug maski teleserye ako sab gi-atngan.
Gawas nga maayo siyang moarte, guapa ug sexy sab ang aktres. Pero ang pinaka-gusto gyud nako niya ang iyang pagka-kikay ug labaw sa tanan ang iyang pagka-natural sa komedi.
Mao siguro nga sa matag pelikula nga iyang buhaton madrama man, aksyon o lovestory may sagol komedi gyud kini kay maoy iyang forte.
Sa iyang pagka-aktres wala usab akoy ikasaway. Matud ni Arci nga usa sa naghatag niyag motivation sa drama dihang nipanaw ang iyang amahan, mao ni usahay ang magdala niya sa eksena para mahimong natural ang iyang pag-arte.
Sa mga hugot usab, inspiration niya ang iyang lovelife ug mga kasinatian sa kinabuhi.
Karon sa bag-o niyang pelikula nga ipagawas sa mga sinehan karong April 10, makita na usab nato ang pagka-natural sa dalaga.
Nakita naman siguro ninyo sa trailer pa lang nga romantic-comedy ang dating niini.
Ang “Last Fool Show” sa direksyon ni Eduardo Roy Jr. ug makapartner dinhi ni Arci Muńoz si JM de Guzman. Malipayon ang duha nga nagkauban sa pelikula human sa pila ka tuig nga nagkauban sila sa usa ka theater group niadto.
Nakahinumdom ang Arci nga nasaypan nilang bading ang JM niadtong mga panahona.
Gikonfirmar sab kini sa ulitawo, kay duha ra sila ka lalaki ang membro sa ilang theatre group ug mga babaye ug bading na ang tanan.
Mao siguro ang hinungdan nganong nasaypan siya nga beki, pero gikan niadto asa naman karon ang ulitawo?
Si Arci Muńoz ug JM de Guzman layo na kaayo ug naabtan, busa pinaagi ani nga pelikula mahanduraw usab sa duha ang ilang mga kaagi.
Sa movie gipasulat ug sugilanon ang Arci para himoon nga pelikula ug ang nabuhat niya, istorya sa iyang lovelife ug ex.
Sa trailer pa lang makalingaw na, mas mosamot pa kon makita na nato ang pelikulang “Last Fool Show.” ay’g saba!