Binasi sa Isaias 43:16-21; Salmo 126; Taga-Filipos 3:8-14; Juan 8:1-11
USA sa labing dakong kalahian sa mga pagano ug sa mga Judio ug mga Kristohanon mao ang pagtulun-an mahitungod sa pakighilawas gawas sa kaminyoon. Alang sa mga pagano intrumento lamang ang lawas sa tawo nga gamiton aron makabaton og lawasnong kalipay. Gani upat sa napulog-lima nga mga sala nga gilista sa sulat ngadto sa mga taga-Galacia nga makapababag sa pagdawat sa gingharian sa Dios mahitungod sa nagpasagad nga lawasnong kalipay. Mao kini ang imoralidad, kahugaw, kalaw-ayan, kahilayan. Alang sa Kristohanon bililhon ug sagrado ang lawas. Ang pagpasagad og gamit niini susama sa pagsimba sa diosdios.
May nadakpan nga babaye nga nakighilawas sa lalaki nga dili niya bana. Gidala kini siya ngadto kang Jesus. “Magtutudlo, kining bayhana nasakpan sa akto nga nanapaw. Sumala sa balaod nga gihatag ni Moises kanamo, batoon ang mga babaye nga sama niini. Busa, ikaw, unsay imong ikasulti?” nangutana ang mga kadagkoan sa mga Judio. Lit-ag unta ang masudlan ni Jesus kon iyang tubag diretsong “oo” o “dili” kay gidili sa mga Judio nga mopahamtang og “capital punishment” apan, sa laing bahin, sumala sa balaod sa mga Judio kinahanglan patyon ang mobuhat sa maong pakighilawas.
Lain ang tubag ni Jesus. Miduko siyag makaduha ug misulat sa yuta. Unya miingon siya, “Ang walay sala kaninyo maoy unang mobato kaniya”. Susama kini sa usa ka pangutana: “Batoon ba ninyo siya bisag kamo mismo makasasala usab?” Namiya ang mga mipasanggil sa babaye. Sa dihang nag-inusara na lang ang babaye, mitapos si Jesus: “Dili usab ako mosilot kanimo. Lakaw, ug sukad karon ayaw na pagpakasala”.
Nasayop ang babaye apan wala siya hukmi ni pahamtangan og silot ni Jesus. Miingon ang Dios pinaagi ni propeta Isaias: “Ayaw na hinumdomi ang nangagi, ni mamalandong kamo sa mga butang sa karaang panahon. Karon, magbuhat ako og bag-ong butang...” Gihimong bag-o ang babaye sa ebanghelyo pinaagi sa pasaylo ni Jesus. Apan wala kini magpasabot nga mahimo niyang buhaton og usab ang iyang gibuhat. Wala siya paandayoni ni Jesus kon dili gihatagan og bag-ong sinugdanan. Nagkanayon si Isaias: “Maghimo akog dalan didto sa kamingawan ug mga suba didto sa disyerto”.
May kalambigitan ang pamalandong diha sa sulat sa mga Taga-Filipos sa hagit nga gisang-at ni Jesus ngadto sa mga buot mobitik kaniya. Miingon si San Pablo: “Giisip ko na ang tanan nga walay bili tungod sa kahibalo bahin ni Cristo Jesus nga akong Ginoo nga labaw pa kaayo kabililhon”.
Sa atong kasamtangang kalibotan may gitawag nga “neo-paganism” kun bag-ong paganismo. Gituistuis sa malangkubon ug mamugos nga pamaagi ang kamatuoran mahitungod sa lawas sa tawo. Bisag kinsa na lay mahimong ikadulog. Ang kaminyoon buot himuon gawas sa babaye ug lalaki. Wala nay bili ug wala na isipa nga sagrado ang lawas sa tawo.