SECTIONS
Tuesday, August 20, 2019
SUPERBALITA CEBU

Osmeña maghimog lain nga lalawigan

MAGHIMO og laing lalawigan si Toledo City Mayor John Henry “Sonny” Osmeña ug tawgon kini og Occidental Cebu, kon siya ang modaog pagka kongresista sa ikatulong distrito sa Sugbo sa piniliay sa Mayo 13.

Sila si kanhi kongresista Pablo John Garcia ug kanhi Pinamungajan mayor Geraldine Yapha, pulos makaatbang ni Osmeña sa congressional race, way nakita ang panginahanglan sa paghimo og laing probinsya gikan sa kasamtangang usa ka lalawigan sa Sugbo.

Apan si Bise Gobernador Agnes Magpale, gubernatorial candidate sa Barug Alang sa Kauswagan ug Demokrasya-Nationalist People’s Coalition (Bakud-NPC), abli sa posibilidad nga maghimo og dugang lalawigan aron dunay dugang kalamboan sa lagyo nga mga lugar, sama sa lungsod sa Pilar, isla sa Camotes.

Apan gusto niya nga tun-an kini og maayo ug gikinahanglan ang plebisito aron kini matuman.

Si Kongresista Gwen Garcia sa ikatulong distrito sa Sugbo ug nidagan pagka gobernador sa umaabot eleksyon, wa motubag sa Superbalita Cebu dihang gi-text ug gitawgan aron pangayoan sa iyang panahom bahin niini.

Apan, sa unang termino pa lang ni Garcia sa dihang kini ang gobernador sa Sugbo, iyang gibabagan ang gitinguha sa mga kanhi kongresista nga sila si Simeon Kintanar (2nd district), Antonio Yapha Jr. (3rd district ug amahan ni Geraldine) ug Clavel Asas-Martinez (4th district) nga buak-buakon ang Sugbo ngadto sa Cebu Occidental province, Cebu del Norte ug Cebu del Sur kun gitawag og Sugbuak niadtong 2005.

Sa iyang pakigpulong sa proclamation rally sa Team Alagad niadtong Biyernes sa gabii, Abril 5, sa Toledo City Megadome, si Osmeña niasoy nga kon siya modaog ang una niyang iduso nga balaudnon mao ang paghimo og Occidental Cebu nga dunay duha ka congressional district.

Kini magsugod sa lungsod sa Barili hangtod sa lungsod sa Tuburan. Apil niini ang mga lungsod sa Aloguinsan, Pinamungajan, Asturias, Balamban, ug siyudad sa Toledo.

Matod niya, tumong niini nga mas mapalambo ang Toledo ug tibuok tersero distrito sa Sugbo aron mahamugaway ug magmauswagan ang mga tawo.

Si Osmeña namulong nga pinaagi sa Occidental Cebu segurado nga modoble ang kwarta sa gobiyerno sa Toledo ug ikatulong distrito, modoble usab ang madawat nga ayuda gikan sa nasudnong kagamhanan tungod kay duna nay duha ka kongresista ug mas modaghan ang mga konsehal.

Siya namahayag nga di matuman ang ilang gitinguha nga magbutang og pantalan sa Toledo nga giingong gibabagan sa Cebu Port Authority kon dili matuman ang Occidental Cebu.

Sigon ni Osmeña nga maong si Magpale ang iyang gipaluyohan sa pagka gobernador tungod kay di matuman ang Occidental Cebu kon si Gwen ang modaog kay supak kini niini.

“Hangyuon ko kamo kay kana atong tinguha di man para sa atong kaugalingon. Kinsa may makaingon dinhi nga ako nagtinguha sa akong kaugalingon? Tanan nakong nahimo sa Toledo, pangalagad ug uban pa para man sa kaayohan sa mga tawo sa Toledo,” pamulong ni Osmeña sa proclamation rally.

Alang ni Pablo John maghimo lang og dugang mga problema ang plano ni Osmeña nga magtukod og Occidental Cebu kon maoy modaog.

“The proposal to divide Cebu--known then and now as Sugbuak--has been resoundingly rejected by the Cebuanos in 2007. The Cebuanos saw it as a dangerous and reckless proposal which will endanger the economic viability of Cebu, to serve merely the narrow political interests of its authors. It’s old trapo politics of divide-and-rule and I reject it,” sigon ni Pablo John sa interview sa SunStar Cebu.

Sumala ni Geraldine dili na kinahanglan ang pagtukod og Occidental Cebu, bisan kon mao usab kini ang giduso sa iyang amahan nga si Antonio uban sa kaubang mga kongresista subay sa tambag ni Osmeña niadtong 2005.

“Because of the push sa atong government to create regional autonomy may it be thru the amendment of the Constitution or the pushing or creating federalism. Para nako dili na kinahanglan mag-create ana to get that the same benefits because naa naman gyud tay tinguha sa atong administrasyon nga mag-federalism,” dugang ni Geraldine.

Apan sigon ni Magpale base sa ilang pagsuroysuroy sa lagyong mga lugar nga layo sa sentro sa pangagamhanan, iyang nakita nga hinay ang kalamboan sa maong mga dapit, sama sa Pilar sa isla sa Camotes.

“Basta the fact is I am open, dili ko anang One Cebu lang kay nakita man gyud nako,” dugang sa bise gobernador. (SCG)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph