KAPIN sa tulo ka milyon ka pesos nga balor sa ilegal nga drugas ang nasakmit sa mga sakop sa City Intelligence Branch (CIB) sa Cebu City Police Office sa usa ka 18-anyos nga lalake atol sa gihimong buy-bust operation Sabado sa alas 10:45 sa gabii, Abril 6.
Ang nasikop giila nga si Nephi Dioso Fernandez, 18, taga Sitio Bliss, Abaka, Barangay Mambaling, Dakbayan sa Sugbo.
Nakuha gikan kaniya ang upat ka large packs sa gituohang shabu ug tulo ka medium packs nga motimbang tanan sa 482.28 gramos nga mokantidad sa P3,279,504.
Nangulo sa buy-bust operation ang hepe sa CIB nga si Police Lieutenant Colonel Carlito Apilat uban sa iyang mga operatiba.
Matud ni Apilat nga niadtong milabay nga buwan aduna sila'y gi-build-up nga operasyon apan niadtong sabado lang kini mibalik sa pag-text.
Ang maong drug personality ilang nailhan nga naa sa sulod sa Cebu City Jail human gitug-an sa ilang mga dinakpan nga didto sila mokuha og suplay.
Misugot kini nga mo-deliver og drugas pinaagi sa pagsugo sa iyang tawo nga naa sa Dakbayan sa Sugbo.
Natingala si Apilat sa dihang lahi na nga tawo ang mihatod sa suplay sa ilegal nga drugas ngadto kanila sukwahi sa unang gihatag sa drug dealer nga naa sa bilangguan.
“Courier na. Gipahatod ra na. Ang among ka transact lahi, lahi sad 'tong gisugo atong naa sa sulod. Kining nadakpan mao ni ang ikaduhang gisugo na mao nani siya karon among nadakpan,” matud ni Apilat.
Gani sa interview sa kapulisan kang Fernandez, giingong makaduha na siya ka higayon nga naka-deliver niadtong Sabado bugti sa dakong suhol nga ihatag kaniya.
Aduna pa'y mga pangalan nga gitug-an ang dinakpan nga mao'y sunod nga rombo sa anti-drug operation. (AYB)