GIBILIN ni Davao City Mayor Sara Duterte-Carpio, ang founder sa Hugpong nga Pagbabago, ngadto sa katawhan ang pagpili o pagboto sa ilang gusto alang sa umaabot nga eleksyon karong Mayo.
Atol sa senatorial caravan ug coalition proclamation rally sa Hugpong ng Pagbabago sa University of Science and Technology of Southern Philippines (USTP) gymnasium ning Siyudad sa Cagayan de Oro, dunay mga magpapili pagka senador sa nasud ang iyang gi-endorso sama nila General Bato Dela Rosa, Zajid Dong Mangudadatu, Sonny Anggara, Pia Cayetano, Imee Marcos, Jinggoy Estrada, JV Ejercito, Francis Tolentino, ug Bong Revilla.
"Well, ang kanang pagpili kung kinsa ang ilahang gusto nga senador ginabilin na nato sa katawhan, because that is the essence of democracy we just present them kini na mga senador niingon sila nga motabang sila sa administrasyon ni President Duterte,” matud ni Sara.
Samtang gibutyag ni Jose Gabriel “Pompee” La Viña kinsa maoy kandidato sa pagka-mayor ubos sa PDP-Laban nga dili na magdahom si Mayor Oscar Moreno nga i-endorso gumikan kay kini ang labing “korap” nga mayor sa tibuok Pilipinas.
“It's only logical, President Duterte and Sara Duterte will never endorse the most corrupt mayor in the Philippines,” matud ni La Viña.
Gidugang pa niini nga dili gyud kini i-endorso ilabi na nga kaalyado kini ni Roxas.
Samtang sa gibalik-balik ni Moreno nga dili niya tumpangan ang mga istorya ni La Viña ug magpa-ilob kini sa tibuok niyang kinabuhi ug nagpasi-aw pa kaniadto nga bisag tiil ni La Viña ang ipataas og apil dili kini importante kaniya kundili ang mas importante mao ang iyang partido diin gi-endorso usab ni President Rodrigo Duterte sama nila ni ABC President Yan Lam “Alam” Lim ug Girlie Balaba.
“Never mind, government service has taught me to be humble and patient, pa-ilob lang ta total di man tinuod nang iyaha lugar di man angayang tumpangan,” matud ni Moreno.