NAHIDANGAT sa probinsya sa Misamis Oriental ang siyam ka mga senador nga magpapili sa umaabot nga eleksyon sa Mayo ning tuiga.
Ang proclamation rally gipahigayon sa Arturo Lugod Gymanasium nga gidungan sab sa rally sa partido PaDayon Pilipino sa Gingoog City.
Kini atol sa 2019 Campaign Caravan nga gipangunahan ni Mayor Sara Duterte-Carpio chairman sa Hugpong ng Pagbabago (HNP) diin moabot ngadto sa 13 ka mga senador ang iyang gi-endorso.
"Ang Hugpong ng Pagbabago usa ka regional political party sa Davao Region nga pulos taga Mindanao mga igsuon ninyo. Gikan sa Luzon lakip Visayas nakakita mi ug mga amigo nga pareha ninyo nga motabang, musuporta ug mobuto para sa mga senador nga motabang sa administrasyon ni Presidente Rodrigo Duterte gikan sa 2019 paingon sa 2022," matud ni Mayor Sara atol sa iyang speech ug usa-usang gipa-ila-ila ang mga senador nga iyang gisuportahan lakip sa iyang amahan.
Tagsa-tagsang pakulo ug kampanya ang gihimo sa mga senador nga gilangkoban nila ni Sonny Angara kinsa mipasalig nga padayunon iyang mga nasugdan ug natabangan sa Misamis Oriental.
Anaa sab si Senator Pia Cayetano kinsa nipaabot nga usa siya sa utok nga moabot ngadto sa tulo ka bulan ang maternity leave sa usa ka inahan nga trabahante.
Si Senator Cynthia Villar nga miingon nga magpokos siya sa mga babae nga mahatagan og trabaho bisan pa og anaa lang kini sa panimalay.
Pasalig sab ni kanhi Special Assistant to the President Bong Go nga iyang padayunon ug palapdan ang mga programa ni Presidente Rodrigo Duterte.
Si JV Ejercito nipaabot nga usa siya sa author sa Universal Health Care nga karon pasado na ug gihulat na lamang ang implementasyon.
Anaa sab ang presensya ni Jinggoy Estrada kinsa nipaabot og dugang ka-arangan sa kabus sa nasud.
Sa iyang bahin sab ni Imee Marcos anak ni kanhi presidente Ferdinand Marcos iyang gipaabot kon unsa ka malambuon ang iyang gipangulohan nga Ilocos Norte diin usa matud pa sa pinakasapian nga lalawigan nga iyang gipasalig nga mahimo sa nasod.
Si kanhi Philippine National Police chief Ronald Bato Dela Rosa nipaabot usab nga kun mahatagan sa higayon nga mahimong senador sa nasod iyang padayunon ang giyera kontra druga ug himoung luwas sa kriminalidad ang nasod.
Anaa sab ang presensya ni Dong Mangudadato kinsa lakip sa iyang hatagan og pagtagad ang panaghiusa sa igsuong Muslim ug Kristiyanos ug himoung “next Dubai” ang Maguindanao.
Miapas sab ang nagpapili pagka Senador nga si actor Bong Revilla kinsa gisulong niini nga hatagan og pension ang mga Overseas Filipino Worker nga magretiro na sa ilang trabaho ug magpuyo na og balik dinhi sa nasod.