NIADTONG adlaw’ng Biyernes, Abril 5, gipahigayon ang 2019 Campaign Caravan kauban ang mga magpapili pagka-senador sa nasud ug lakip mga nagpapili sa lokal nga posisyon sa Siyudad sa Gingoog ug mga posisyon sa probinsya sa Misamis Oriental.
Dinapit nga bisita ang anak ni Presidente Rodrigo Duterte nga mao si Davao City Mayor Sara Duterte-Carpio kinsa chairman sa regional party nga Hugpong ng Pagbabago (HNP) nga kaalyado sa partido sa PaDayon Pilipino gipangunahan ni Misamis Oriental Governor Bambi Emano ug ni Gingoog City Mayor Marie Guingona.
Nahidangat si Mayor Sara sa Arturo Lugod Gymnasium sa Gingoog City aron i-endorso ang 13 ka mga senador sa nasud nga gibutyag niini nga dako og tabang sa administrasyong Duterte.
Human sa pag-usa usa niini sa mga senatorial bets, iya sab dayon gi-isa ang kamot sa mga kandidato sa partido sa PaDayon Pilipino pinangunahan nila ni Emano kinsa magpapili og subli sa iyang posisyon, Board Member President Elipe kinsa magpapili pagka bise gobernador sa Misamis Oriental, Benjo Benaldo nga magpapili pagka kongresista sa ikaduhang distrito ug mga board members.
Lakip nga giisa ni Mayor Sara sila Guingona, kinsa karon magpapili pagka bise mayor ug Ruthie Delara Guingona nga modagan pagka mayor sa Gingoog.
Si Emano mapasalamaton sa pag-endorso ni Mayor Sara kanila tungod kay nakita niini ang pagtinabangay sa umaabot.
"Dili matawag nga edge apan adunay ikatabang ang pagpataas ni Mayor Sara sa atong mga kamot. Makatabang sa amoa kay naa man mga tao nga karon galantaw gatuo kang Presidente Duterte pinaagi kang Mayor Sara," matud ni Emano.
Gipasalamatan sab niini si Mayor Guingona tungod sa ubay-ubay ka mga tawo nga dili mominos 5,000 ka mga indibidwal ang mitambong sa proclamation rally.
"Mapasalamatan ta kang Mayor Guingona ubay-ubay ang mga tao nga miduyog sa proclamation dayag nalang nga ang Gingoog is biggest and largest voting population," dugang ni Emano.
Sa iyang bahin sab ni Mayor Sara iyang gipasalamatan ang lalawigan ug Siyudad sa Gingoog sa init nga pagdawat kanila.
"Daghang salamat sa inyo sa Misamis Oriental ug Gingoog City sa init nga pagdawat sa amoa," matud ni Mayor Sara.