Sugilanon: Mga plastik nga rosas

Sugilanon: Mga plastik nga rosas

LAMBERTO G. CEBALLOS

Cawayan, Dalaguete, Cebu

NATAGAD ang panan-aw ni Juvelyn nianang buntaga sa mga pula nga mga rosas sa ibabaw sa iyang ‘working desk’ sa kilid sa iyang ‘computer table.’ Nakalabay na ang tulo ka adlaw human sa iyang ‘birthday party’ nga dinhi ra sa ilang balay gisaulog alang sa iyang ika-25 nga pangedaron. Tulo ka pungpong ang rosas; may tagutlo ka bulak kada pungpomg, gikan sa tulo ka ulitawo nga nanguyab kaniya: Jimmy, Frank, Treb. Sa tulo ka pungpong may duha nga nalawos na, pipila ka mga gihay ug dahon niini nangatagak sa lamesa. Pero ang ikatulo kay lab-as pa kaayong tan-awon. Nahibulong siya, maong iyang gipunit. Nakapahiyom siya pagka himatngon nga plastik diay ang mga rosas. Pero wa siya makadiparal nga plastik diay kini niadtong gabii sa iyang ‘birthday.’ Gihikap niya ug gitutokan ang maong pungpong. Sama gyud sa tinuod nga rosas ang mga gihay ug dahon niini. ‘Kinsa kaha ang naghatag niini?’ sukna niya sa iyang kaugalingon. Mahibaw-an ra unya kini niya kay pangutan-on niya ang tulo niya ka maghahalad. Unya nabati niya ang tunog sa iyang selpon nga didto tupad sa iyang ‘laptop.’

Gipunit niya ang selpon. ‘Incoming call’ gikan ni Treb.

“Hi! Good morning, Treb! What’s up?” matod ni Juvelyn nga mitapion sa selpon sa iyang tuo nga dunggan.

“Buot lang ko masayod kon kinsa gyud namong tulo ni Jimmy ug Frank ang naay luna sa imong dughan, Juve,” ni Treb.

“Naglibog lagi ko, kay pulos man mo maayo. Kon tulo pay akong kasingkasing tagsaan ta mo aron way mahay,” ni Juvelyn.

“Okey. Maghuwat lang ko kon makahukom ka na. Hinaot ako ang palaran. Bye!”

“Treb, wait!” ni Juvelyn. “Duna koy ipangutana. Kinsa kaha ang mihatag og plastik nga mga rosas adtong pag-birthday nako? Ikaw ba?”

“Ah, eh... ako, Juve,” tug-an ni Treb.

“A, plastik diay imong gugma ngari nako! Dili inuod!”

“Sayop ka sa imong pagtuo, Juve. Plastic roses ang akong gihatag nimo kay simbolo na sa way pagkupas kong gugma nimo,” miigham si Treb. “Ang plastik dili madunot hangtod kapid-an ka tuig kay non-biodegradable. Mao na akong gugma nimo, dili madunot hangtod sa akong kamatayon. Tan-awa, nangalaylay ba ang mga gihay? Nangatagak ba ang mga dahon?”

Gitan-aw ni Juvelyn ang pungpong sa plastik nga mga rosas. Ingon sa misamot kapula ang kolor niini ug daw misamot kalunhaw ang mga dahon. Mipahiyom siya nga malimbation.

“Wa man maunsaay, Treb,” ni Juvelyn.

“Mao na ang akong pagmahal nimo, Juve. Way pagkalaya!”

Nahilom si Juvelyn. Nasimba niya ang katiunay sa gugma ni Treb kaniya.

“Hello? Naa pa ka diha?” ni Treb. “Ha? Aw, yes, Treb, I’m still here!”

“Pwede dapiton tikag ‘lunch’ karon?”

Naghinuktok kadiyot si Juvelyn, dayon mitubag, “Okey!”

“I’ll pick you up at eleven. Okey?”

“Okey!” ni Juvelyn nga nagpahiyom. Unya gitiklop niya ang iyang selpon. Nakahukom na siya kinsa ang sugton sa tulo niya ka maghahalad. ‘Problem solved,’ hunghong niya sa iyang kaugalingon. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph