HUMAN mahibaw-i sa non-government organization (NGO) nga adunay dakong proyekto ang Davao City Water District (DCWD) ug Apo Agua sa Aboitiz Power Corp. ug JV Angeles, nagsugod napud sila sa pagpangdaut.
Nakahibawo bamo og kinsa ni? Kadtong gidaut nila ang mga banana plantations dinhi sa Mindanao pinaagi sa aerial spray nga daghan daw kuno ang nangasakit ug namatay, bisan kon walay datos o mga ebedensiya, pero sa kadugayan nawala ra ang maong isyu, tingali naka kwarta na?
Kini mao ang Interface Development Interventions (IDIS), karon nga plantsado na ang tanan, misulod na usab sila aron dauton ang maong proyekto aron aduna kita’y reserbasyon sa tubig panagana alang sa atong sunod nga henerasyon sa atong Dakbayan sa Davao.
Karon ilang patuhuon ang katawhan nga aduna kuno’y "mercury" ang dapit sa Tamugan ug Panigan River kon diin kini ang sentro sa proyekto.
Kung inyong mahinumdoman, sa sakop pa ang Mount Diwalwal sa probinsiya sa Davao del Norte, nahimong dakong isyu ang mercury.
Ang mercury usa ka matang sa metal nga gamiton aron isagol kini sa mga bato kung diin adunay mitapot nga bulawan kon gold ore; kinahanglan kining dugmukon og pino.
Sumala sa pagtuon ang inalisngaw niini, makadaut sa mga tawo kon sa mga trabahante kay magmugna kini og mga matang sa sakit nga gikahadlokan sa tanan.
Kini ang gipanghadlok sa IDIS aron nga dili madayon ang maong proyekto, nga wa’y laing trabaho mao ang pagdaut sa mga proyekto nga para sa mga tawo.
Sumala pa nila, hayan kuno nga duna na’y nagmina nianang dapita sa milabay nga mga katuigan nga tingali sa wala pa matawo si Ferdinand Magellan, sa laktod, naghimo-himo og sugilanon.
Sa atong pagpanuki-duki o research, duha ra ka nasud sa kalibutan nga nakit-an nga dunay CINNABAR ORE kung diin gikan ang mercury, kini mao ang nasud sa Espanya ug China, ang Pilipinas wala maapil sa listahan.
Si Hydie Maspinas, Quality Control Division sa DCWD nagbutyag nga giila ang DCWD sa Department of Health (DOH), gilarawan kini nga excellent sa kada tuig, gina-inspeksiyon ug gi-testing ang teknolohiya nga nagpadagan niini diin gamit ang Atomic asorption nga maka-detect sa nagkalain-laing elemento sa tubig ug mga micro organismo.
Aron paghatag og konklusyon, dili kita magpadala sa mga NGO’s nga dunay hidden agenda nga ang tumong ug tuyo mao tingali ang pagpanguwarta, aron lang dauton ang mga proyekto agi'g pagpangandam sa atong ibilin nga kaliwatan sa atong mahal nga Dakbayan sa Davao.
Suportahan nato ang proyekto sa DCWD, Apo Agua sa Aboitiz Power Corp. ug sa JV. Angeles nga sa dili madugay pagasugdan na, diha sa kasapaan sa Tamugan ug Panigan.