COTABATO CITY -- Gipaigmat pa sa otoridad ang pagbantay sa mga dapit sa probinsiya sa Maguindanao nga anaa sa hotspot area sa Commission on Elections (Comelec).
Anaa sa heightened alert ang mga sundalo ug pulis sa mga lungsod sulod sa SPMS nga gilangkuban sa Datu Salibo, Saudi Saudi Ampatuan, Mamasapano, Datu Unsay, Shariff Aquak, ug Shariff Saydona Mustapha Maguindanao.
Ingon man ang mga dapit duol sa Liguasan Delta, Rajah Buayan, Sultan Barongis, SK Pindatun, Datu Piang ug kilid sa North Cotabato.
Gipailawom sa “Areas of Comelec Concern” ang mga nahisgutang dapit gumikan sa presensiya sa mga miyembro sa Bangsamoro Islamic Freedom Fighters (BIFF), mga terorista nga langyaw og uban pa nga mga armadong pundok nga hulga sa nagsingabot nga piniliay.
Gibantayan sab sa otoridad ang mga armadong taga-suporta sa uban nga mga kandidato.
Ang mga private armed groups sa kanhi gobernador sa Maguindanao nga si Datu Andal Ampatuan Sr. nagtago-tago na karon sa mga hilit nga dapit sa probinsiya.
Una na nga gihangyo ni Governor Esmael ”Toto” Mangudadatu ang gobyerno nga dakpon ang mga nahibilin nga mga armadong sakop ni Andal Ampatuan nga gilambigit sa mangilngig nga masaker sa Maguindanao nga mikalas sa 58 ka kinabuhi apil na ang 32 ka sakop sa media diin uban nila gawasnon pa.
Andam sab ang Comelec nga mga sundalo ug pulis ang molingkod nga mga Board of Election Inspectors (BEIs) sa mga dapit nga gipailawom sa Comelec Control.