BUOT nalang unta tapuson sa usa ka lalaki ang iyang kinabuhi human niini nasayran nga di na motindog ang iyang kinatawo.
Daling girespondehan sa mobile patrol sa Talomo Police Station ang usa ka 43-anyos nga lalaki didto sa NHA Bangkal, Barangay 74-A, Matina Crossing, Davao City human ilang nadawat ang tawag sa mga kabanay, Sabado sa buntag, Abril 6.
Gilayong gidala sa Talomo Police Station ang 43-anyos nga si Joel (bansagon gitago), ulitawo, apan gipauli ra sab kini.
Subay sa impormasyon nga nakalap sa SuperBalita Davao didto sa mga silingan ni Joel, giingong tapuson nalang unta niini ang iyang kinabuhi pinaagi sa pagpusil sa kaugalingon.
Giingong pipila ka semana na kining masulob-on gumikan naproblema kay di na sumala pa motindog ang iyang “junior”.
Nahibal-an kini dihang nanugilon si Joel sa usa sa iyang mga higala sa pamasin nga matabangan siya kung unsay tambal sa iyang problema.
Sabado sa buntag, nakit-an nalang sa mga kabanay nga naggunit na og pusil si Joel, aron pusilon ang kaugalingon, apan maayo nalang kay nadala kini sa istorya.
Nakuha sa posisyon ni Joel ang usa ka super caliber .38 nga pistola nga dunay mga buhing bala.
Wa sab gikabutyag kun duna ba'y balatian sa panglawas si Joel nga maoy hinungdan nga di na motindog ang iyang kinatawo.
Ang nahisgutan ug ang kabanay niini gimandoan sa kapulisan nga ipahiling sa doktor ang maong lalaki aron mahatagan og tambal sa maong problema.