ARON pagpalig-on sa ilang puwersa, ang University of San Jose Recoletos (USJ-R) Baby Jaguars, ubos sa pagdumala sa headcoach niini nga si Edito “Itoy” Salacut, mopahigayon og tryouts sugod karong adlawa diha sa USJ-R gym sa ilang campus sa Basak-Pardo, dakbayan sa Sugbo.
Kini maoy gipahibawo ni Salacut, kinsa kanhi usab player sa USJ-R.
Ang nahisgutang tryout nga magsilbing preparasyon sa 2019 Cebu Schools Athletic Foundation, Inc. (Cesafi) secondary division nga sugdan kada alas 9 sa buntag, ipahigayon hangtod sa Sabado (Abril 13).
“Daghan man mawala sa team. Sagad ani ni-graduate na sa high school. Ngita na sab tag bag-o nga may potensiyal nga mga players,” padayag ni Salacut kinsa mao usab ang coach sa Minglanilla Archangels, ang unang kampiyon sa Cebu Governor’s Cup inter-cities/municipalities 21-under tournament.
Ang Baby Jaguars misakmit sa ikatulong luna sa niaging Cesafi season. (JBM)