OPISYAL na’ng nanamilit si Bobby Ray Parks sa San Miguel Alab Pilipinas ug Asean Basketball League (ABL) aron atubangon ang bag-o niyang tahas isip basketbolista.
Pinaagi sa iyang Twitter account, gipabuhagay ni Parks ang iyang pasalamat sa iyang team ug sa ABL sa tulo ka mga tuig niyang pagduwa nga nagpahashas og dugang sa iyang abilidad.
“It’s been great and learned a lot. Thanks to [all] who supported and allowed me the privilege of being in the league. On to the next chapter,” tweet ni Parks.
Duha ka ABL Local MVP awards ang naangkon ni Parks sa iyang pagduwa sa Alab Pilipinas nga iyang natabangan sa pag-angkon sa titulo sa miaging tuig.
Ning tuiga, napakyas ang Alab Pilipinas sa pagdepensa sa ilang titulo human sila gipalagpot sa Hong Kong Eastern, 2-0, sa best-of-three quarter-finals series ning bag-uhay lang.
Ning higayuna, ang 26 anyos nga basketbolista magtutok na sa iyang kampanya sa Philippine Basketball Association (PBA) diin magduwa siya sa kampo sa Blackwater Elite.
Sa kasamtangang nagpadayon nga PBA Philippine Cup, ang Blackwater usa sa mga sayong nanamilit bitbit ang 2-9 nga rekord sa elimination round.
Hinuon sa paghiabot ni Parks, gilauman nga mausab na ang dagan sa kampanya sa Blackwater nga ningkuha sa 6’4” nga magduduwa isip No.2 overall sa miaging PBA Rookie Draft. (ESL)