MIAMAG ang poruhan sa Brooklyn Nets nga makasulod sa nagkaduol nga playoffs human nila gipangpukan ang No.1 squad ug host Milwaukee Bucks, 133-128, kagahapon sa NBA.
Bitbit ang 40-40 nga rekord, ang Nets mingsaka sa ikaunom nga luna sa Eastern Conference diin ilang gikauban ang Orlando Magic.
Nagkinahanglan na lang modaog og usa sa katapusan nilang duha ka mga tahas ang Nets aron makaseguro sila’g luna sa playoffs.
Sa kasamtangan, tulo na lang ka mga puwesto ang nahabiling bakante sa playoffs sa Eastern Conference diin lima ang nag-ilog niini lakip na ang Nets.
Sa habig sa Bucks (59-21), nga ningkombati nga wala ang ilang labing pambato nga si Giannis Antetokoumnpo, wala ra nakaapekto kanila ang kapildihan gumikan kay naseguro na man nilang daan ang No.1 overall spot.
Ang Nets kanunay nga naglabaw og dobleng numero nga puntos apan bisan wala si Antetokoumnpo, kinsa adunay angol, ang Bucks nakamaneho lang gihapon pagtabla sa duwa sa hinapos nga bahin.
Gikan sa panagtabla, si Joe Harris nagpabuto og three-point bomb sa nahabiling 1:24 minutos aron hatagan ang Nets og 131-128 nga labaw.
Giinat ni All-Star pointguard D’Angelo Russell ang labaw sa Nets, 133-128, sa pinaagi sa iyang lauyup sa nahabiling 59 segundos.
Wala na nakabangon pagbalik ang Bucks human niini hangtod na sa katapusang gutlo.
Gipangulohan ni Russell ang kadaugan sa Nets pinaagi sa iyang 25 puntos ug 10 assists, nihatag og 24 puntos si Caris LeVert samtang nitampo og iyang season-high nga 16 puntos si Jared Dudley.
Nangulo sa Bucks si Eric Bledsoe pinaagi sa iyang 33 puntos ug 11 assists samtang nitampo og 24 puntos si Khris Middleton.
Sa laing duwa, gipanglampornas sa Philadelphia 76ers ang Chicago Bulls, 116-96.
Ang 76ers, nga ningsaka sa 500 nga rekord gipangulohan ni JJ Redick pinaagi sa iyang 23 puntos samtang nidugang og 20 puntos si Joel Embiid.
Ang Bulls, nga ningdakin-as sa 22-58 nga rekord ug usa sa teams nga wala na’y poruhan sa playoffs, gipangulohan ni Jakkar Sampson pinaagi sa iyang career-high nga 29 puntos. (AP, ESL)