ANG konseho nipalabang og resolution para tabangan sa Cebu City Government mapalambo ang 11 ka estasyon sa kapulisan ilawom sa Cebu City Police Office (CCPO).
Si Konsehal Joel Garganera, chairman sa Police Advisory Council ( PAC), maoy niduso og resolution aron awhagon si Mayor Tomas Osmeña nga mogahin og pundo.
“It is imperative for the City to allocate funds for our police stations to repair and maintain their station offices for their role in the society by patrolling and apprehending criminals and devote considerable time for public outreach and proactive problem solving,” tipik sa resolution ni Garganera.
Ang Cebu City maoy gikonsidera nga Queen City of the South apan dili adunay mga PS nga dili presentablo ug haom trabahoan.
Ang chairman sa PAC niingon nga angay palambuon ang mga police station (PS) sama PS 7 nga iyang dili haom himuon opisina gumikan sa kahagip-ot sa lugar ug ang piniriso maoy nagbantay sa pulis sanglit ang silda naa dapit sa entrada.
Garganera niingon nga daghang nga angay paninduton sama sa PS 11 sa barangay Mambaling, PS 5 sa Carbon ug permanteng PS 9 sa Guadalupe ug PS 10 nga karon naa sa barangay Labangon.
Iyang gidasig si Osmeña sa pagbisita sa maong mga PS aron iyang makita personal ang kahimtang sa PS.
Ang gitawag og ‘Panday’ sa konseho niingon nga nagsalig lang sa private sector ang CCPO sa pagpalambo sa ilang PS ug panahon na nga moabag ang City Government gawas pagbayad sa konsumo sa kuryente ug tubig.
Gihulagway ni Garganera nga angay usab hatagan og gibug-aton ang paningkamot sa pulis hilabi na ang ilang pagpakiggubat sa ginadiling drugas diin kinilo ang masakmit sa ilang mga operasyon. (B)