MOHANGYO ang mga abogado nila ni San Francisco Mayor Aly Arquillano ug Bise Mayor Alfredo “Al” Arquillano Jr. nga ipaubos og marathon hearing ang pagdungog sa korte sa ilang kaso.
“Because this involves the life and liberty of a person, atong i-speed up ang trial,” pamulong ni retired judge Meinrado Paredes, lead counsel sa mga Arquillano.
Matod ni Edmund Lao, manlalaban sa Barug Alang sa Kauswagan ug Demokrasya (Bakud) party diin mga miyembro ang magsuon, nga hangyuon nila ang hukmanan nga mapaspasan ang husay kay dili makiangayon nga mapiangan ang ilang mga kliyente nga pulos mga kandidato sa pagka mayor ug bise mayor sa umaabot nga piniliay.
Siya namahayag kon di makagawas ang mayor ug bise mayor ang mopuli ang unang konsehal nga kandidato sa pagka mayor ug mahikawan ang mga tawo nga maoy nibotar sa mga Arquillano nga modumala sa ilang lungsod.
Si Paredes nibutyag nga moduso sila og motion to quash nga maghangyo sa Danao City Regional Trial Court karong Miyerkules, Abril 10, nga himuong dili balido ang search warrant nga giisyu sa hukmanan sa lungsod sa Barili nga maoy gigamit sa kapulisan sa Cebu Provincial Police Office sa pagsiksik sa balay sa mga Arquillano sa Barangay Poblacion, San Fernando, niadtong Abril 4.
“We will argue. We’re going to prove that the search warrant is null and void. It was issued by a court without territorial jurisdiction over the place where the crime was supposedly or allegedly committed,” pamulong ni Paredes.
Apan magpaabot una sila sa impormasyon sa kaso nga iduso sa kapulisan ngadto sa korte sa Danao karong Lunes, Abril 8.
Moduso usab sila og motion to bail sa korte sa Danao aron makagawas ang magsuon.
Atol sa gipatawag nga press conference niadtong Dominggo, Abril 7, si Paredes nibutyag nga gihimakak sa iyang mga kliyente nga niangkon kini nga sila ang nanag-iya sa mga armas ug granada nga nasakmit.
“Ang grenade planted gyud. Gi-deny nila nga niangkon sila (sa armas),” pamulong sa retiradong huwes.
Sigon ni Lao, base sa affidavit sa searcher, arresting officer ug photographer, ang granada ug AR 15 rifle didto nakuha sa kwarto ni Mayor Aly samtang ang caliber 22 rifle ug empty shells didto nakuha sa kwarto ni Vice Mayor Al.
Sumala niini base sa asoy sa mga testigo nga gikan sa alas 6 sa buntag hangtod sa alas 7 sa buntag ang armadong mga pulis na ang niokupar sa panimay sa mga Arquillano human giingong gipagawas ug wala na pasudla ang mga nagpuyo niini.
“There is an issue on the validity sa occupation and the search sa lugar without the presence sa actual residents and the witnesses,” dugang niini.
Gikwestyon usab ni Paredes ang presensiya sa mga sakop sa Provincial Drug Enforcement Unit (PDEU) nga mga armas man ang gipangita ug kon nganong karon lang gidakop ang iyang mga kliyente nga hapit na eleksyon, kon kaniadto pa na-report nga duna kini gitinir nga armadong mga tawo. (SCG)