Tubag sa San Francisco sa kiha sa DILG

IDUSO sa kagamhanan sa lungsod sa San Francisco karong Lunes, Abril 8, sa Department of Interior and Local Government (DILG) ang tubag niini sa pasangil nga wa ma-activate niini ang Anti-Drug Abuse Council (Adac).

Si Edmund Lao, manlalaban sa Barug Alang sa Kauswagan ug Demokrasya (Bakud) party diin sakop si San Francisco Mayor Aly Arquillano, namahayag nga wa ma-report og apil sa focal person sa Adac sa maong lungsod ang tanan niining accomplishments nga nahimo.

Matod niya, nangayo og tubag ang DILG Manila sa lungsod nga isumitir ngadto sa municipal government operations officer ug hatagan og kopya ang provincial ug regional offices sa ahensiya.

“If na-submit completely ang records, it will establish nga naa sila'y in place (Adac),” pahayag ni Lao atol sa press conference niadtong Dominggo, Abril 7 sa Golden Prince Hotel, siyudad sa Sugbo.

Siya namahayag pinaagi sa tubag, mapaklaro sa mga opisyal sa lungsod nga duna kini klaro nga Adac uban sa mga kalihokan niini.

Si Lao nagkanayon nga pinaagi sa kabag-ohan nga gihimo sa mga Arquillano sa ilang panggobiyerno, ang San Francisco ang nakauna sa pagtukod sa purok system nga nagmalampuson ug gisunod og patuman sa ubang mga local government unit sa lalawigan.

Ang DILG nikiha sa 50 ka mga mayor, tulo niini naa dinhi sa Sugbo, ngadto sa Office of the Ombudsman, gumikan sa giingong ilang kapakyas sa pag-organisar ug pagpalihok sa ilang Adac sa ilang area of responsibility.

Apil sa mga mayor mao sila si San Francisco Mayor Aly Arquillano, Toledo City Mayor John Henry Osmeña ug San Fernando Mayor Lakambini Reluya.

Sila si Arquillano ug Osmeña gikiha kay wala makaorganisar og Adac, samtang si Reluya tungod kay giingong wa mag-function ang Adac sa ilang lungsod.

Apan sila si Arquillano ug Osmeña niingon nga duna na silay Adac sa tagsatagsa ka dapit.

Si Arquillano unang niingon nga dili unta sila madeklarar nga drug-cleared sa Cebu Provincial Anti-Drug Abuse Office (Cpadao) sa miaging tuig kon dili pa aktibo ang ilang Adac sa lungsod. (SCG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph