KAPIN sa P3 milyones nga balor sa ilegal nga druga ang nasakmit sa mga sakop sa City Intelligence Branch (CIB) sa Cebu City Police Office (CCPO) gikan sa usa ka 18 anyos nga lalake atol sa gihimong buy bust niadtong Sabado, Marso 6, sa alas 10:45 sa gabii.
Ang nasikop mao si Nephi Dioso Fernandez, 18, taga Sitio Bliss, Abaka, Barangay Mambaling, dakbayan sa Sugbo.
Nakuha gikan kaniya ang upat ka dakong pakete sa gituohang shabu ug tulo ka medium packs nga motimbang ang tanan og 82.28 gramos nga mokantidad sa P3,279,504 base sa value sa Dangerous Drugs Board (DDB).
Nangulo sa buy-bust ang hepe sa CIB nga si Police Lieutenant Colonel Carlito Apilat uban sa iyang mga operatiba.
Matod ni Apilat nga niadtong milabayng buwan, aduna silay gipanid-an apan niadtong Sabado, Abril 6, lang kini nibalik sa pag-text kanila hinungdan sa ilang paglusad sa operasyon.
Ang maong drug personality ilang nailhan nga naa sa sulod sa Cebu City Jail human gitug-an sa ilang mga dinakpan nga didto sila mokuha og supply.
Misugot kini nga mo-deliver og drugas pinaagi sa pagsugo sa iyang tawo nga naa sa siyudad sa Sugbo.
Apan natingala si Apilat sa dihang lahi na nga tawo ang nihatod sa supply sa ilegal nga drugas ngadto kanila sukwahi sa unang gihatag sa drug dealer nga naa sa bilanggoan.
“Courier na, gipahatod rana, ang among ka transaksyon, lahi sad tong gisugo atong naa sa sulod, kining nadakpan mao ni ang ikaduhang gisugo na mao nani siya karon among nadakpan,” matod ni Apilat.
Gani sa interview sa kapulisan kang Fernandez giingong makaduha na siya ka higayon nga nakahatod niadtong Sabado. Abril 6, bugti sa dakong suhol nga ihatag kaniya.
Aduna pay mga pangalan nga gitug-an ang dinakpan nga maoy ilang sunod nga rumbo sa anti-drug operations.
Daghang nasikop ang kapulisan nga gibutyag sa unang nadakpan. (AYB)