ATOL ning pagsuwat, duha ka mga lalake nga nag-edad og 15 ug 22 ang gipangita sa kapulisan sa Guadalupe police station human nisumbong sa ilang buhatan ang duha mga menor de edad nga babaye, 13 ug 14 anyos, nga gilugos.
Ang mga ngan sa suspek gipugngan una ning mantalaan samtang wala pa kini madakpi samtang mga biktima pulos menor de edad.
Sumala sa asoy sa mga babaye ngadto sa kapulisan, niadtong Sabado sa gabii, Abril 6, nag-inom sila uban sa mga suspek sa usa ka dapit sa Sitio Banawa, Barangay Guadalupe.
Apan sa dihang nangahubog na, ang mga menor de edad nga mga babaye gihilabtan kini sa ilang kauban sa inom ug giingong nakuha ang ilang pagka babaye.
Ug kagahapon sa kaadlawon, Abril 7, nagpatabang ang duha sa Guadalupe police station ug gireklamo ang duha nga ilang kainom.
Si P/Captain Dexter Basirgo, hepe sa Guadalupe police station, niingon nga nailhan sa mga biktima ang mga suspek nga mao karon ang gipangita sa iyang mga sakop.
Kasamtangan nga naa pa sa pink room sa Vicente Sotto Memorial Medical Center (VSMMC) ang duha ka biktima aron mapaubos sa eksaminasyon ang ilang kinatawo.
Gihulagway ni Basirgo ang 13 anyos nga nagka dugo pa ang short pants niini nga nagpamatuod nga nakuha gyud ang iyang pagka babaye.
“Ongoing pa ang follow-up operation ron sa atong tawo kay aron madakpan dayon nang mga suspek, identified man nila nga maoy nag lugos,” matod ni Basirgo.
Naalarma si Basirgo nga sa ilang pangidaron nga 13 ug 14 anyos nga pulos mga babaye naa pa sa gawas nag-inom uban sa mga lalake sa lawom nga oras sa kagabhion.
Ning maong mga edara, matod niya, angayan pa kini nga naa ra sa balay uban sa ilang nga ginikanan.
“Dapat kining ingon ani nga pangidaron ba monitoron gyud unta ni sa mga ginikanan kung naka uli na ba, kinsay mga kuyog kay basin madisgrasya simbako lang, tan-awa ni karon nahitabo na gyud,” dugang sa hepe sa Guadalupe.
Nakig-alayon na usab ang kapulisan sa barangay official sa Guadalupe aron madakpan sa labing dali nga panahon ang mga suspek.