GILUSAD sa Department of Agriculture (DA)- Central Visayas ang Summer Buko Fest sa dakbayan sa Mandaue, Lunes sa buntag, Abril 8.
Gihimo ang Summer Buko Fest tungod sa mando ni Agriculture Secretary Emmanuel “Manny” Piñol.
Human nakita ni Secretary Piñol nga kinahanglan awhagon ang mga coconut farmers nga magbaligya og buko kaysa copra tungod mas mobarato ang presyo sa pagbaligya sa copra ug taas-taas ang panahon sa pagpaabot aron lang makakwarta sila.
Gawas nga mas makatabang kini aron makakwarta ang mga mag-uuma, kon mamaligya sila og buko juice ug unod niini, gitagaan usab og bili ang nutritional value sa buko tungod daku og ikatabang sa panlawas sa mga tawo ang pag-inum og buko juice kaysa pag-inom og mga softdrinks.
Gani, agi og suporta, mimando si Piñol sa mga kawani nga tanang kalihukan sa DA, buko juice na ang i-serve nga ilimnon imbes nga mga softdrinks o bisan unsa nga sugary drinks.
Ang nangulo nga ahensiya sa paglusad mao ang Philippine Coconut Authority, kinsa usa ka dugtong ahensiya sa DA ug gitambungan usab sa mga miyembro sa Regional Management Council.