SUPERBALITA DAVAO

Roldan: Tigulang nga badlungon

Nota Bene

MALIPAYONG pagsaulog sa Araw ng Kagitingan.

Pista opisyal karon isip paghandom sa kabayanihan sa atong mga sundalo nga nakigbatok sa mananakop nga Hapon sa Ikaduhang Gubat sa Kalibutan. Paghandom kini sa kaisog sa atong mga katigulangan nga naggamit la'g pusil nga surit-surit, sundang ug bangkaw aron panalipdan ang atong nasud.

Sila kadtong mga tigulang nga nagbuhis og singot ug dugo ug naghalad sa ilang kaugalingon alang sa kaugalingnan ug demokrasya sa nasud.

Kumusta na man ang atong mga beterano diha? Pipila na lang kaha karon ang nahibiling beterano?

Ang akong amahan nahimong gerilya sa Sugbo. Dugay nga panahon niyang gilihok ang iyang papeles sa Philippine Veterans Affairs Office (PVAO) dinhi sa Davao hangtud nga nahatagan siya'g sertipiko isip beterano niadtong 2000.

Sa kahinay sa proseso sa maong opisina niadtong tungura, nadawat namo ang iyang sertipiko mga 2004 na o usa ka tuig human siya namatay sa pangedarong 88 anyos.

Namatay siya nga wala makahibalo nga giila siyang beterano sa gobyerno. Wa pod niya personal nga natagamtami ang pension nga dugay na niyang gihandom.

Kung wa tingali siya nagpursiger sa pagbalik-balik sa PVAO, hayan di niya makuha ang iyang sertipiko ug benepisyo isip beterano. Pila pa kaha kanila karon ang nagpunay pa'g follow-up sa ilang papeles?

Matud pa sa uban nga kung lisud ang giyera batok sa Hapon kaniadto, mas lisud ron kay di nila masayran kung kinsa ang kaaway kay nganong grabe ka dugay ang proseso sa pagkuha sa ilang benepisyo.

Manghinaut kita nga sa administrasyon ni PRody nausab na ang dagan diha sa PVAO.

Sa pagkatinuod, naila ang Pilipinas sa pagmahal sa atong pamilya.

Suod ug mangunay gayod kita pag-atiman sa atong mga katigulangan sa talisawop nga yugto sa ilang kinabuhi.

Ato silang ginapaduol imbis nga ipahilayo kay bililhon sila kanato. Apan dili malikayan nga may mga tigulang nga badlungon. Ang tanang gidili maoy buhaton. Kusog gihapon moinom og bino ug manigarilyo bisan kung nagyuko na sa gahing ubo.

Karong bag-o lang, nahimong sumsuman ang nag-viral sa social media ang nahitabo ni Jim Paredes nga nagkatigulang na sab.

Ilado siyang sikat nga singer sa grupong Apo Hiking Society.

Matud pa sa nakakita sa iyang video nga kung kanus-a pa natigulang didto pa nagpabadlong.

Segurado nga kamo diha aduna say mga istorya kabahin sa badlungon nga tigulang sama nga may padlungon nga batan-on. Masuko kita nga daghang pasaway nga bata-on apan angay sab natong ikasuko ang mga pasaway nga tigulang.

Mas lisud ra ba badlungon ang tigulang nga di magpatawag og tigulang kay mosakit daw ang ilang hawak.

Mas OK daw ang hamtong ug edaran kay medyo bagets ang dating. Busa ayaw na pabadlong Manoy!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph