Daghang IEDs, armas ug bala sakmit sa militar

MAGUINDANAO -- Nasakmit sa mga sundalo ang daghang mga improvised explosive devices (IEDs) ug mga armas nga wa pa mahuman og gama, ug daghang mga bala human ang usa ka oras nga binakbakay nga nahitabo batok sa Bangsamoro Islamic Freedom Fighters (BIFF) alas 5:40 sa hapon, Dominggo, Abril 7.

Nasayran nga nilusad og law enforcement focus military operation ang hiniusang puwersa sa 1st Mechanized Infantry Battalion, 37th Infantry Battalion, ug 6th ID’s elite 64th Division Reconnaissance Company, Philippine Army didto sa Barangay Tina, Shariff Aguak, Maguindanao batok sa BIFF.

Migamit ang militar og mga kanyon, hinungdan nga nagkatibulaag ang mga BIFF ug niikyas pasulod sa hilit nga dapit sa SPMS Box.

Tulo ka mga sakop sa BIFF ang nasamdan nga naila nga sila Kadir Ibra, Moctar Badu ug Angkay Madzid samtang duha sab sa bahin sa mga sundalo. (Edgar E. Fuerzas)